انقرہ (ڈیلی پاکستان آن لائن) ترکی کی ایک عدالت نے اس ہوٹل کے مالک اور معمار کو 18 سال سے زائد قید کی سزا سنائی ہے جس میں پچھلے سال زلزلے کے بعد عمارت گرنے سے 72 افراد ہلاک ہوئے تھے۔ان ہلاک شدگان میں شمالی قبرص کے ایک سکول والی بال ٹیم کے 26 ارکان بھی شامل تھے۔ گرینڈ ایسئیس ہوٹل، جو ادیامان میں واقع تھا، فروری 2023 کے زلزلے میں منہدم ہو گیا تھا۔ اس زلزلے کے نتیجے میں ترکی میں 55 ہزار جانیں ضائع ہوئیں۔
العربیہ کے مطابق ادیامان کی عدالت نے ہوٹل کے مالک احمد بوزکرت کو "شعوری غفلت کے ذریعے ایک سے زیادہ افراد کی موت یا زخمی ہونے کا سبب بننے" کے جرم میں 18 سال اور 5 ماہ قید کی سزا سنائی۔ احمد بوزکرت کے بیٹے، محمد فاطح بوزکرت کو 17 سال اور 4 ماہ قید کی سزا دی گئی۔ ہوٹل کے معمار اردم یلماز کو انہی الزامات پر 18 سال اور 5 ماہ کی قید سنائی گئی۔
عدالتی فیصلے کے بعد ترک قبرص کے وزیراعظم اُنال اوستیل نے میڈیا سے بات کرتے ہوئے کہا کہ سزائیں بہت نرم ہیں اور وہ اس معاملے کو اعلیٰ عدالت میں لے جائیں گے۔ہوٹل کے مالکان کو وہ سزا نہیں ملی جس کی ہمیں توقع تھی لیکن اس کے باوجود، ہوٹل کی تعمیر کے ذمہ دار تمام افراد، بشمول معمار، کو سزا دی گئی، اس سے ہمیں جزوی طور پر سکون ملا۔
خیال رہے کہ زلزلے میں اس ہوٹل کے گرنے پر حکومت کو ایسی عمارت کی تعمیر کی اجازت دینے پر جس کے پاس ضروری اجازت نامے نہیں تھے، کڑی تنقید کا سامنا کرنا پڑا تھا۔