لاہور(فلم رپورٹر)پاکستان فلم انڈسٹری کو یادگار گیت دینے والے گلوکار سلیم رضا کی41ویں برسی آج منائی جائے گی۔50 اور60 کی دہائی میں پاکستانی فلم انڈسٹری کو یادگار گیت دینے والے گلوکار سلیم رضا کی41ویں برسی آج منائی جائے گی۔4 مارچ 1932 کو بھارتی پنجاب کے شہر امرتسر میں پیدا ہونے والے سلیم رضا کو کلاسیکی موسیقی میں مہارت حاصل تھی۔انہوں نے گلوکاری کا آغاز ریڈیو پاکستان سے کیا اور 1955 میں فلم نوکر سے فلمی صنعت میں قدم رکھا اور اسی سال ریلیز ہونیوالی فلم قاتل کے گیت گا کروہ کافی مقبول ہوگئے۔انہیں اصل شہرت 1957 میں فلم سات لاکھ کے گیت یارو مجھے معاف رکھو میں نشے میں ہوں سے ملی جس کے بعد انہوں نے متعدد فلموں کو اپنے گیتوں سے مزئین کیا، جن میں اے دل کسی کی یاد میں، جان بہاراں رشک چمن اور کہیں دو دل جو مل جاتے جیسے متعدد یادگار نغمات شامل ہیں۔ خوبصورت آواز کے مالک سلیم رضا 25 نومبر 1983 کو گردے فیل ہونے کے باعث 51 سال کی عمر میں کینیڈا میں انتقال کر گئے تھے۔