لاہور (ڈیلی پاکستان آن لائن)منڈی بہاؤالدین میں ایچ پی وی ویکسین لگانے پر پروین نامی خاتون نے 15 خواتین کے ساتھ مل کر لیڈی ہیلتھ ورکر کو تشدد کا نشانہ بنا ڈالا،پولیس نے مقدمہ درج کر لیا ہے۔
صوبائی وزیر صحت و آبادی خواجہ عمران نذیر نے واقعہ کا نوٹس لیتے ہوئے متعلقہ سی ای او سے رپورٹ طلب کر لی ہے۔ڈی پی او سے ٹیلی فونک رابطہ کر کے ملزمان کی جلد گرفتاری کی ہدایت بھی کی۔
خواجہ عمران نذیر کا کہنا ہے لیڈی ہیلتھ ورکرز ہماری بہنیں اور بیٹیاں ہیں، ان کی تضحیک ہر گز برداشت نہیں کی جائے گی، میں اپنی ان تمام لیڈی ہیلتھ ورکرز بہنوں اور بیٹیوں کے ساتھ ہوں، جو اس کار خیر میں ہراول دستے ہیں، لیڈی ہیلتھ ورکرز پر تشدد کرنے والے قرار واقعی سزا سے نہیں بچ سکیں گے۔
انہوں نے کہا خدارا جھوٹے پراپیگنڈا میں نہ آئیں ، یہ ویکسین ہماری بچیوں کے محفوظ اور صحت مند مستقبل کی ضمانت ہے۔