اسلام آباد (این این آئی)وفاقی وزیر مواصلات نے پاکستان پوسٹ میں گزشتہ حکومت کے دوران 4 ہزار بھرتیوں کی تحقیقات کا حکم دیدیا۔ جمعرات کو وفاقی وزیر مواصلات عبدالعلیم خان کی زیر صدارت رائٹ سائزنگ اجلاس میں محکمے کی کارکردگی کا تفصیلی جائزہ لیا گیا۔ وفاقی وزیر نے موٹروے پولیس افسران کی سرزنش کرتے ہوئے کہا سرکاری فنڈز مال غنیمت نہیں، ان کی بندر بانٹ نہیں ہونے دی جائیگی۔ انہوں نے کہا بطور وزیر محکمے سے اپنی ذات کیلئے کوئی ملازم نہیں لیا، افسران بھی اپنے وسائل میں رہ کر کام کریں۔ قومی خزانہ فضول خرچیوں اور غیر ضروری بوجھ کا متحمل نہیں ہو سکتا۔ انہوں نے پاکستان پوسٹ میں گزشتہ حکومت کے دوران 4 ہزار بھرتیوں کی تحقیقات کا بھی حکم دے دیا۔ انہوں نے کہا رشوت دیکر بھرتی ہونیوالے ملازمین فارغ اور افسران کیخلاف کارروائی ہوگی۔ وفاقی وزیر نے پاکستان پوسٹ کو قابل عمل بزنس پلان لانے کا آخری موقع دیتے ہوئے پوسٹل لائف انشورنس کو بھی مربوط بزنس پلان لانے کی ہدایت کی۔ انہوں نے کہا ادارے خسارے کی روش کے ساتھ اپنا وجود برقرار نہیں رکھ سکتے، رائٹ سائزنگ سے موجودہ ماڈل کو بہتر اور نقصان کم کرنا چاہتے ہیں۔ وفاقی وزیر نے موٹروے پولیس کو اپنی افرادی قوت کا ازسرنو تعین کرنے کی ہدایت کردی۔ عبدالعلیم خان نے دوٹوک الفاظ میں کہا کہ ادارے اگر کارکردگی نہیں دکھائیں گے تو ان کی نجکاری ناگزیر ہوگی۔
پاکستان پوسٹ