بڑا احسان ہم فرما رہے ہیں
کہ انکے خط انہیں لوٹا رہے ہیں
نہیں ترک محبت پر وہ راضی
قیامت ہے کہ ہم سمجھا رہے ہیں
یقیں کا راستہ طے کرنے والے
بہت تیزی سے واپس آ رہے ہیں
یہ مت بھولو کہ یہ لمحات ہم کو
بچھڑنے کے لئے ملوا رہے ہیں
تعجب ہے کہ عشق و عاشقی سے
ابھی تک لوگ دھوکا کھا رہے ہیں
تمہیں چاہیں گے جب چھن جاؤ گی تم
ابھی ہم تم کو ارزاں پا رہے ہیں
کسی صورت انہیں نفرت ہو ہم سے
ہم اپنے عیب خود گنوا رہے ہیں
وہ پاگل مست ہے اپنی وفا میں
مری آنکھوں میں آنسو آ رہے ہیں
دلیلوں سے اسے قائل کیا تھا
دلیلیں دے کے اب پچھتا رہے ہیں
تری بانہوں سے ہجرت کرنے والے
نئے ماحول میں گھبرا رہے ہیں
یہ جذبۂ عشق ہے یا جذبۂ رحم
ترے آنسو مجھے رلوا رہے ہیں
عجب کچھ ربط ہے تم سے کہ تم کو
ہم اپنا جان کر ٹھکرا رہے ہیں
وفا کی یادگاریں تک نہ ہوں گی
مری جاں بس کوئی دن جا رہے ہیں
شاعر: جون ایلیا
Barra Ehsaan Farmaa Rahay Hen
Keh Un K Khat Unhen Lotaa Rahay Hen
Nahen Tark e Muhabbat Par Wo raazi
Qayaamat hay Keh ham Samjha Rahay Hen
Yaqeen Ka Raasta Tay Karnay Waalay
bahut Tezi Say Waapas Aa Rahay Hen
Yeh Mat Bhoolo Keh Yeh Lamhaat Ham Ko
Bicharrnay K Liay Milwaa Rahay Hen
Taajubb Hay Keh Eshq o Aashqi Say
Abhi Kuch Log Dhoka Kha Rahay Hen
Tumhen Chaahen Gay jab Chhin Jaao GiTum
Abhi Ham Tum Ko Arzaan Paa Rahay Hen
Kisi Soorat Unhen Nafrat Ho Ham Say
ham Apnay Aib Khud Ginwaa Rahay Hen
Wo Paagal Mast Hay Apni Wafaa Men
Miri Aankhon Men Aansu Aa Rahay hen
Daleelon Say Usay Qaail Kia Tha
Daleelen Day K Pachtaa Rahay Hen
Tiri Bahon Say Hijrat Kar K
Naey mahol Men Ghabraa Rahay Hen
Yeh Jazba Eshq Hay ya Jazba e Rehm
Tiray Aansu Mujhay Rulwaa Rahay Hen
Ajab Kuch Rabt Hay Tum Say Keh Tum Ko
Ham Apna Jaan Kar Thukraa Rahay Hen
Wafa Ki YaadgaarenTak Na Hon Gi
Miri Jaan Bass Koi Din, Jaa Rahay Hen
Poet: Jaun Elia