ایک فیصلہ بھی اپوزیشن کےمشورے کے بغیر نہیں کیا، مولانا فضل الرحمان نے"پی ڈی ایم" سے متعلق تہلکہ خیز انکشاف کر دیا

 تونسہ ( ڈیلی پاکستان آن لائن ) جمعیت علماء اسلام (جے یو آئی ف) کے سربراہ  مولانا فضل الرحمان نے"پی ڈی ایم" سے متعلق تہلکہ خیز انکشاف کر دیا۔

تفصیلات کے مطابق تونسہ میں جلسہ عام سے خطاب میں جمعیت علماء اسلام (جے یو آئی ف) کے سربراہ مولانا فضل الرحمان نےانکشاف کیا ہے کہ سیاسی اتحاد پاکستان ڈیموکریٹک موومنٹ (پی ڈی ایم) اب تک نہیں ٹوٹا ہے۔ پی ڈی ایم کا سربراہ اب تک میں ہی ہوں اور اپوزیشن میں ہوں جبکہ باقی جماعتیں حکومت میں ہیں۔ پارلیمنٹ میں عوام کی نمائندگی ہم کررہے ہیں، ہم نے ایک فیصلہ بھی اپوزیشن جماعتوں سے مشورے کے بغیر نہیں کیا، ہماری تجویز تھی کہ آئینی عدالت قائم ہو، جو سیاسی کیسز کے فیصلے کرے۔

"جنگ " کے مطابق جے یو آئی سربراہ کا کہنا تھا  کہ 77  برسوں سے یہ بحث ختم نہیں ہورہی تھی کہ سود کو کیسے ختم کیا جائے، قوم کے اندر سیاسی شعور پیدا کرنے کی ضرورت ہے ،ہمارے الیکشن میں دھاندلی ہوتی ہے۔ہماری پسماندگی کا غلط استعمال ہو رہا ہے، ہم جبر ظلم کےخلاف جنگ جاری رکھیں گے،انگریز کے وفادار ہمیں غلامی پر رضامند رکھنا چاہتے ہیں جبکہ ہمارا میدان غلامی سے بغاوت ہے۔

ان کا کہنا تھا کہ امریکا انسانی حقوق کا قاتل اور اسرائیلی وزیراعظم جنگی جرائم کا مرتکب ہے،ہماری غربت کو ہماری کمزوری تصور کیا جا رہا ہے۔ڈیڑھ سال میں فلسطین میں60 ہزار شہری بمباری سے شہید ہوئے،امریکا اور یورپ بھی اسرائیل کی حمایت کرنے پر برابر کے مجرم ہیں، جن کے ہاتھوں سے انسانیت کا خون ٹپک رہا ہے۔ غزہ میں بچے، جوان، بوڑھے موت کا انتظار کررہے ہیں، مسلمان حکمران اگر خاموش ہیں تو وہ بھی جبر میں شریک ہیں۔