پشاور میں نشستیں3 سے 7 کروڑ روپے میں فروخت ہوئیں، تیمور سلیم جھگڑا کا دعویٰ

پشاور (ڈیلی پاکستان آن لائن)رہنما پی ٹی آئی تیمور سلیم جھگڑا نے دعویٰ کیا ہے کہ پشاور میں تاریخی دھاندلی ہوئی ہے، سیٹیں 3 سے 7 کروڑ روپے میں فروخت ہوئیں۔

پشاور میں میڈیا سے گفتگو میں انہوں نے کہا کہ الیکشن کمیشن کو فارم 45 دینے کی درخواست دی مگر اب تک نہیں دیے، میرے حلقے کے فارم 45 الیکشن کمیشن نے اپلوڈ کر کے دوبارہ ڈیلیٹ کیے، جوڈیشل انکوائری کر کے ملوث افسران کے خلاف کارروائی کی جائے۔

انہوں نے کہا کہ چیف سیکرٹری اور آئی جی نے کیا کِیا آج تک؟ ہم انتقامی کارروائی نہیں بلکہ انصاف چاہتے ہیں، ہم سب وزیراعلیٰ کو خط لکھیں گے کہ جوڈیشل انکوائری ہو۔

تیمور جھگڑا کا کہنا ہے کہ علی امین گنڈاپور اور بانی پی ٹی آئی صوبائی کابینہ بنائیں گے، اگر میں الیکشن واقعی ہارا ہوں تو کابینہ میں میرا حق ہی نہیں بنتا۔