پہاڑی تودہ گرنے سے جاں بحق 23 افراد کی نماز جنازہ ادا
کوہستان(مانیٹرنگ ڈیسک) پہاڑی تودہ گرنے سے جاں بحق ہونے والے 23 افراد کی نماز جنازہ ادا کردی گئی ہے۔
نجی ٹی وی دنیا نیوز کے مطابق 6 روز قبل کوہستان کے علاقے میں لینڈ سلائڈنگ کے نتیجے میں 23 افراد ملبے تلے دب گئے تھے۔ 6 روز تک ملبے تلے دبے افراد کی تلاش کی گئی تاہم کسی کی لاش کو ملبے سے نہ نکالا جاسکا جس کے بعد مایوس ہوکر مقامی افراد نے لینڈ سلائڈنگ والی جگہ کو قبرستان قرار دے دیا اور وہیں پر تمام افراد کی نماز جنازہ ادا کردی ۔ نماز جنازہ میں آرمی کے جوانوں سمیت کثیر تعداد میں لوگوں نے شرکت کی اور اس دلخراش سانحے پر ہر آنکھ نم نظر آئی۔
