پختونوں سے امتیازی سلوک برداشت نہیں

لاہور(اے این این) وزیراعلی خیبرپختونخواپرویز خٹک نے کہا ہے کہ پختونوں سے زیادہ محب وطن کوئی نہیں ٗ امتیازی سلوک برداشت نہیں کرینگے ۔پختون ویلفیئر آرگنائزیشن کے ایک اجلاس سے خطاب کرتے ہوئے پرویز خٹک نے کہا کہ پختون پاکستانی ہیں اور پنجابیوں، سندھیوں اور بلوچیوں کو اپنا بھائی تصور کرتے ہیں۔انھوں نے پختونوں کی رجسٹریشن کے حوالے سے پنجاب حکومت کے فیصلے کو تنقید کا نشانہ بناتے ہوئے کہا کہ پختون کسی قسم کا امتیازی سلوک برداشت نہیں کریں گے اور اسی وقت خود کو رجسٹر کروائیں گے جب پنجابی، سندھی اور بلوچی خود کو رجسٹر کروالیں گے۔انھوں نے سوال کیا کہ کیا وزیراعلی پنجاب شہباز شریف ہم سے زیادہ پاکستانی ہیں؟ساتھ ہی وزیراعلی خیبرپختونخوا نے خبردار کیا کہ 'ہمیں دیوار سے نہ لگایا جائے ورنہ ہم باغی ہوجائیں گے۔پرویز خٹک نے کہا کہ مسلم لیگ ن کی حکومت پختونخوں کو اس لیے سزا دے رہی ہے کیونکہ ہم پاکستان تحریک انصاف کے رکن اور حامی ہیں۔انھوں نے کہا کہ وہ بذات خود وزارت داخلہ کو پنجاب میں پختونوں سے ہونے والے امتیازی سلوک کے حوالے سے خط لکھیں گے۔خیبرپختونخوا کے وزیراعلی کا کہنا تھا کہ حکومت ملک میں اتحاد کے نعرے لگا رہی ہے لیکن حقیقت میں پختونوں کو کسی بھی جرم کے بغیر جیل کی سلاخوں کے پیچھے بھیجا جارہا ہے۔ انہوں نے کہا کہ پختون درحقیقت دہشت گردی سے سب سے زیادہ متاثر ہیں۔پرویز خٹک نے کہا کہ ملک میں جب بھی کوئی دہشت گردی کا واقعہ ہوتا ہے تو سب سے زیادہ درد پختون ہی محسوس کرتے ہیں۔
پرویز خٹک