معروف دانشور، ادیب اور صحافی سرور منیر راؤ کی نئی کتاب "مدینہ منورہ تاریخ کے آئینے میں" شائع ہو گئی

اسلام آباد( ڈیلی پاکستان آن لائن ) معروف دانشور، ادیب اور سینئر صحافی سرور منیر راؤ (تمغۂ امتیاز) کی نئی کتاب "مدینہ منورہ تاریخ کے آئینے میں" شائع ہو گئی ہے۔

نیشنل بک فاؤنڈیشن کی جانب سے شائع کردہ 496 صفحات پر مشتمل یہ کتاب مستند تاریخی حوالوں، نادر معلومات اور رنگین نقشوں سے مزین ہے۔ اس کتاب میں مدینہ منورہ کی تاریخ کو ایک سادہ اور تجزیاتی انداز میں دریافت کیا گیا ہے، جس میں ماضی اور حال کی جامع تفہیم فراہم کی گئی ہے۔
سرور منیر راؤ کی یہ پہلی کتاب نہیں ہے، ان کی  2 کتابیں "میں نے بغداد جلاتے دیکھا" اور "عراق جنگ" بھی نیشنل بک فاؤنڈیشن کی طرف سے شائع ہو چکی ہیں اور انہیں بہت پذیرائی ملی تھی۔
نیشنل بک فاؤنڈیشن کے منیجنگ ڈائریکٹر ڈاکٹر کامران جہانگیر نے کہا ہے کہ اس کتاب کی اشاعت فاؤنڈیشن کی جانب سے تحقیق اور علم کے فروغ کے لیے ایک اہم اقدام ہے۔ انہوں نے اس بات پر زور دیا کہ فاؤنڈیشن کا مشن صرف کتابوں کی اشاعت  ہے، بلکہ پڑھنے کے کلچر کو فروغ دینا اور سائنس اور ادب سے وابستہ شخصیات کو سامنے لانا اور ان کے کام کو عوام تک پہنچانا ہے۔