محکمہ اوقاف کی ڈیجیٹائزیشن کا پہلا مرحلہ مکمل
لاہور(خبر نگار) صوبائی وزیر اوقاف ومذہبی امور چوہدری شافع حسین کی زیر صدارت محکمہ صنعت و تجارت کے کمیٹی روم میں اجلاس ہوا جس میں اوقاف کے معاملات کی ڈیجیٹا ئزیشن کے عمل کا جائزہ لیا گیا۔ سیکرٹری ڈاکٹر طاہر رضا بخاری نے ڈیجیٹا ئز یشن پراسیس بارے صوبائی وزیر کو بتایا کہ محکمہ اوقاف و مذہبی امور کی ڈیجیٹائزشن کا پہلا مرحلہ مکمل ہوچکا ہے جبکہ دوسرے مرحلے میں او قا ف کی پراپرٹیز کے رینٹ کی آن لائن کلیکشن شروع کی جائے گی۔ ڈیجیٹائزیشن کا دوسرا مرحلہ رواں سال دسمبر تک مکمل ہو جائے گا۔ وزیر اوقاف چوہدری شافع حسین نے کہا کہ اوقاف کی اربوں روپے مالیت کی پراپرٹی ہے لیکن کرایہ بہت کم اکٹھاہوتا ہے۔صوبائی وزیر نے ہدایت کی کہ اوقاف کی پراپرٹی کا رینٹ بڑھانے کیلئے میکانزم بنایا جائے۔ اوقاف کی اربن اراضی کی مناسب اسیسمنٹ کی جائے اور تمام ریکارڈ ڈیجیٹائز کیا جائے۔
صوبائی وزیر نے کہا ڈیجیٹائزیشن کے عمل کو تیزی سے آگے بڑھایا جائے اور محکمہ اوقاف کا اپنا آئی ٹی ڈیپارٹمنٹ بھی ہونا چاہئے۔ ایڈیشنل سیکرٹری اوقاف نبیلہ جاوید،ڈی جی اوقاف ومذہبی امور خالد محمود سندھو اور متعلقہ افسران نے بھی اجلاس میں شرکت کی۔
