منفی پروپیگنڈے میں ملوث پی ٹی آئی کے 25 افراد آج دوبارہ جے آئی ٹی میں طلب 

اسلام آباد (آن لائن)جے آئی ٹی نے منفی پروپیگنڈے میں ملوث پی ٹی آئی کے 25 افراد کو آج منگل کو دوبارہ طلب کر لیا۔جے آئی ٹی نے پی ٹی آئی کے 25 افراد کو طلب کیا تھا۔پی ٹی آئی کے بیرسٹر گوہر رؤف حسن اور شاہ فرمان جی آئی ٹی کے سامنے پیش ہوئے تھے۔جے آئی ٹی نے پی ٹی آئی کے رہنماؤں سے پانچ گھنٹے تفتیش کی تھی۔ذرائع کے مطابق، شاہ فرمان نے جے آئی ٹی کے سامنے نامناسب رویہ اختیار کیا تھا۔  جے آئی ٹی نے شاہ فرمان  سے کچھ اضافی اور سخت سوالات بھی کئے تھے۔پی ٹی آئی رہنماؤں اور سوشل میڈیا ٹیم کو دوبارہ جے آئی ٹی نے طلب کیا ہے۔جے آئی ٹی نے منگل کیلئے جن کو طلب کیا ہے ان میں سلمان اکرم راجا، رؤف حسن، سید فردوس شمیم نقوی،محمد خالد خورشید خان،میاں محمد اسلم اقبال، محمد حماد رضا شامل ہیں۔طلبی نوٹس وصول کرنے والوں میں عون عباس، عالیہ حمزہ ملک، محمد شہباز شبیر، وقاص اکرم، کنول شوزب، تیمور سلیم خان اور اسد قیصر کے نام بھی شامل ہیں۔شاہ فرمان، آصف رشید، محمد ارشد، صبغت اللہ ورک، اظہر مشوانی، محمد نعمان افضل، جبران الیاس، سلمان رضا، ذلفی بخاری، موسیٰ ورک اور علی ملک کو بھی طلبی کا نوٹس جاری کیا گیا۔جے آئی ٹی ان تمام افراد سے شواہد کی روشنی میں تحقیقات کر رہی ہے۔ ان افراد کیخلاف تحقیقات ریاست مخالف پروپیگنڈے کے حوالے سے کی جا رہی ہے۔یاد رہے کہ جے آئی ٹی  بذریعہ نوٹیفیکیشن F.No.8/9/2024-FIA/، الیکٹرانک جرائم کی روک تھام ایکٹ 2016 کے سیکشن 30 کے تحت تشکیل دی گئی تھی۔جے آئی ٹی انسپکٹر جنرل آف پولیس، اسلام آباد کی سربراہی میں تحقیقات کر رہی ہے۔نوٹسز میں ان تمام افراد کو متنبہ کیا گیا ہے کہ اس معاملے پر اپنی پوزیشن کی وضاحت کریں۔

جے آئی ٹی