سلمان اکرم راجہ کے انسداد دہشت گردی عدالت سے جاری وارنٹ معطل 

                                                                                    اسلام آباد(این این آئی)پی ٹی آئی رہنما سلمان اکرم راجہ کے انسداد دہشتگردی عدالت سے جاری وارنٹ اسلام آباد ہائی کورٹ کے ڈویژن بینچ نے معطل کردئیے، عدالت نے فریقین کو نوٹس جاری کرتے ہوئے 2 ہفتوں میں جواب طلب کرلیا۔پیرکوقائمقام چیف جسٹس سرفراز ڈوگر اور جسٹس محمد آصف نے درخواست پر رجسٹرار آفس کے اعتراضات کیسا تھ سماعت کی جس میں وکیل سلمان اکرم راجا ذاتی حیثیت میں عدالت میں پیش ہوئے۔قائمقام چیف جسٹس نے سماعت کے آغاز پر استفسار کیا الزام کیا اور درخواست پر اعترا ض کیا ہے؟ جس پر سلمان اکرم راجہ نے بتایا الزام ہے کسی پولیس اسٹیشن پر حملہ ہوگیا ہے، میں اس میں شامل تھا جس پر قائمقام چیف جسٹس نے مسکراتے ہوئے مکالمہ کیاآپ ایسے نہ کریں ناں پھر،آپ کو پتا ہے ناں آپ کے بارے میں کہا جاتا ہے آپ بولتے بہت ہیں۔سلمان اکرم راجہ نے کہا میں پہلے گرفتار ہو چکا ہوں، پیشی کے باوجود وارنٹ جاری ہونا حیران کن ہے۔عدالت نے استفسار کیا درخواست پر اعتراض کیا ہیں جس پر سلمان اکرم راجہ نے بتایا میرے ناقابل ضمانت وارنٹ جاری ہوئے، یہ سنجیدہ معاملہ ہے۔ قا ئمقا م چیف جسٹس نے مسکراتے ہوئے کہا یہ تو واقعی سنجیدہ معاملہ ہے۔سلمان اکرم راجہ نے کہا میں روٹین میں ریگولر کورٹ میں پیش ہوتا ہوں، انہوں نے سپریم کورٹ کا صغریٰ بی بی کیس کا حوالے بھی دیاجس پر عدالت نے ریمارکس دئیے آفس اعتراض دْور کر کے کل پر سماعت رکھ لیتے ہیں تو سلمان اکرم راجہ نے کہا پرسوں رکھ لیں، اڈیالہ جیل جانا ہے۔ سلما ن اکرم راجہ نے کہا ایف آئی آر میں 100 لوگوں کا نام لکھ دیا ہے کہ ان کا اتا پتا معلوم نہیں،ابھی کہہ رہے ہیں تفتیش کر رہے ہیں جن کا اتا پتا نہیں ان کے وارنٹ جاری کر رہے ہیں، بعد ازاں عدالت نے وارنٹ معطل کرتے ہوئے فریقین کو نوٹس جاری کر دیا۔قائمقام چیف جسٹس نے استفسار کیا ڈپٹی اٹارنی جنرل کون ہے؟ اس موقع پر اسسٹنٹ اٹارنی جنر ل عثمان گھمن عدالت میں پیش ہوئے۔ قائمقام چیف جسٹس نے ریمارکس دئیے عدالتی حکم پر عملدرآمد یقینی بنائیں۔بعد ازاں کیس کی سماعت 2 ہفتوں تک ملتوی کردی گئی۔

سلمان اکرم وارنٹ