حکومت نے چینی کی بڑھتی ہوئی قیمت کو کنٹرول کرنے کا راستہ ڈھونڈ لیا

اسلام آباد (ویب ڈیسک) حکومت نے رمضان المبارک میں چینی کی بڑھتی ہوئی قیمت کو روکنے کیلئے شکر درآمد کرنے کا فیصلہ کر لیا ہے جس سے صارفین کو ریلیف ملے گا اور مقامی سطح پر قیمتوں میں بھی کمی آئے گی۔

نجی ٹی وی آج نیوز نے ذرائع سے دعویٰ کیاہے کہ شکر کی درآمد سے مستقبل میں چینی کی پیداوار کو بڑھانے میں مدد ملے گی، درآمد شدہ شکر کو مقامی سطح پر ریفائن کر کے چینی میں تبدیل کیا جا سکے گا۔

ذرائع وزارت صنعت و پیداوار کے مطابق شوگر انڈسٹری نے پچھلے سال حکومت کو یقین دہانی کرائی تھی کہ چینی ایکسپورٹ ہونے سے ملک میں چینی مہنگی نہیں ہوگی لیکن حکومت کو کرائی گئی شوگر انڈسٹری کی یقین دہانی بے کار گئی۔

رمضان المبارک میں چینی کی قیمت کو پر لگ گئے، لاہور اور پشاور میں ایک کلو چینی 10 روپے اضافے کے بعد 170 روپے، کراچی میں 180 روپے اور کوئٹہ میں ایک کلو چینی 165 روپے کی ہوگئی۔