مریم نوازکی نائب صدر ترکیہ سے ملاقات، معاشی شراکت داری کے فروغ پر اتفاق

انطالیہ ( ڈیلی پاکستان آن لائن ) وزیر اعلیٰ پنجاب مریم نواز نے ترکیہ کے نائب صدر سے ملاقات کی، جس میں دونوں ممالک کے درمیان مشترکہ تعلیمی منصوبوں اور معاشی شراکت داری کو فروغ دینے پر اتفاق کیا گیا۔

تفصیلات کے مطابق اناطولیہ  ڈپلومیسی فورم 2025 کانفرنس کی سائیڈ لائنز پر ترکیہ کے نائب صدر جودت یلماز اور وزیر اعلیٰ پنجاب مریم نواز میں ملاقات ہوئی -نائب صدر جودت یلماز نے ڈپلومیسی فورم میں شرکت پر وزیر اعلیٰ پنجاب مریم نواز کا شکریہ ادا کیا -وزیر اعلیٰ نے کانفرنس میں مدعو کرنے پر شکریہ ادا کیا-دونوں رہنماؤں نے پاکستان اور ترکیہ کے دوطرفہ دلچسپی کے امور اور تعاون بڑھانے پر گفتگو کی-قائدین نے دونوں ممالک کے درمیان مشترکہ تعلیمی منصوبوں اور معاشی شراکت داری کو فروغ دینے پر اتفاق کیا-دونوں رہنماؤں نے معاشی امکانات، تجارت، تعلیم اور ہنر کی ترقی پر مشترکہ کاوشوں پر تبادلہ خیال کیا-

وزیر اعلیٰ مریم نواز  نے نائب صدر ترکیہ سے گفتگوکرتے ہوئے کہاکہ ترکیہ پاکستان دو بھائی ہیں -وزیر اعلی مریم نواز نے ترکیہ کے نائب صدر کو پنجاب کے دورے کی دعوت دی-رہنماؤں نے ہنر مند افرادی قوت اور گلوبل سکل میپنگ میں تعاون پر بات چیت کی-

وزیراعلیٰ مریم نواز نے سابق وزیراعظم محمد نواز شریف اور وزیراعظم شہباز شریف کی طرف سے ترکیہ کے نائب صدر کے لیے نیک تمناؤں کا پیغام پہنچایا-وزیراعلیٰ مریم نواز نے نائب صدر ترکیہ کو صوبہ پنجاب میں تعلیم اور ہنر کی ترقی کے اپنے منصوبوں سے آگاہ کیا-