لوئر کرم میں مورچوں کی مسماری کا عمل شروع، فورسز نے 2 کو بموں سے اڑا دیا

پشاور(ڈیلی پاکستان آن لائن )لوئر کرم میں سکیورٹی فورسز اور پولیس نے کارروائی کرتے ہوئے 2 مورچوں کوبموں سے اڑا دیا جبکہ مورچوں کی مسماری کے موقع پر آرمی ، پولیس اور ایف سی کی بھاری نفری تعینات تھی۔
روز نامہ امت نے ڈپٹی کمشنر کرم اشفاق خان کے حوالے سے بتایا کہ مورچوں کی مسماری کا عمل شروع ہوگیا، آج دن بھر مختلف کارروائیوں کے دوران 4 بنکرز کو مسمار کیا گیا ہے، بنکرز ہٹانے کے لئے آج جرگہ ممبران سمیت مقامی عمائدین سے بات چیت مکمل ہوئی۔
ضلع انتظامیہ کا کہنا ہے کہ مورچوں کی مسماری کے موقع پر سخت سکیورٹی کے انتظامات کئے گئے ہیں۔
کرم میں امن وامان کی بحالی کے سلسلے میں کوہاٹ امن معاہدے پر عمل درآمد شروع کردیا ہے، مورچوں کی مسماری کے لئے پولیس، آرمی اور ایف سی کی بڑی نفری خار کلی بالش خیل میں موجود ہیں۔
سکیورٹی ذرائع کا کہنا ہے کہ مزید بنکرز کو بھی مسمار کیا جائے گا۔