صوبائی وزیر سہیل شوکت بٹ کا نارووال میں اداروں کا اچانک دورہ، ناقص انتظامات پر سخت ایکشن
لاہور (ڈیلی پاکستان آن لائن ) صوبائی وزیر برائے سوشل ویلفیئر اینڈ بیت المال پنجاب، سہیل شوکت بٹ نے ضلع نارووال میں محکمہ سوشل ویلفیئر اینڈ بیت المال کے مختلف اداروں کا اچانک دورہ کیا۔ دورے کے دوران اداروں میں ناقص انتظامات، ادویات کی کمی، صفائی کے غیر تسلی بخش حالات اور رہائشیوں کے لیے کھانے کی قلت جیسے سنگین مسائل کا انکشاف ہوا۔
صوبائی وزیر نے ناقص کارکردگی اور غفلت پر سخت برہمی کا اظہار کرتے ہوئے ڈپٹی ڈائریکٹر نارووال محمد غالب کو فوری طور پر معطل کرنے کے احکامات جاری کیے۔ سہیل شوکت بٹ نے واضح کیا کہ عوامی فلاحی اداروں میں غفلت اور لاپرواہی ہرگز برداشت نہیں کی جائے گی اور ذمہ داران کے خلاف سخت کارروائی عمل میں لائی جائے گی۔
انہوں نے متعلقہ حکام کو فوری اصلاحی اقدامات کرنے اور اداروں کی کارکردگی کو بہتر بنانے کی ہدایت دی۔ صوبائی وزیر نے یقین دہانی کرائی کہ سائلین اور مستحق افراد کو بہتر سہولیات کی فراہمی حکومت پنجاب کی اولین ترجیح ہے۔
