ضم اضلاع کے زمینداروں کی بہبود اولین ترجیح ہے،میجر (ر) سجاد بارکوال
پشاور(سٹاف رپورٹر)خیبرپختونخوا کے وزیر زراعت میجر ریٹائرڈ سجاد بارکوال کی زیر صدارت ضم اضلاع کے اراکین صوبائی اسمبلی کا ایک اجلاس پشاور میں منعقد ہوا۔ جس میں اراکین صوبائی اسمبلی آصف محسود، انورزیب، ڈاکٹر حمید الرحمان، ڈائریکٹر جنرل زراعت توسیع اورڈائریکٹر جنرل سائل کنزرویشن سمیت محکمہ زراعت کے دیگر متعلقہ افسران نے شرکت کی۔ اس موقع پرضم اضلاع سے متعلق محکمہ زراعت کے مختلف منصوبوں کے بارے میں تفصیلی بریفنگ دیتے ہوئے ورلڈ بینک اور محکمہ زراعت کے باہمی اشتراک سے شروع ہونے والے ٹنل فارمنگ اور ورٹیکل فارمنگ ٹیکنالوجیز پر بھی شرکاء کو آگاہ کیاگیا۔ بریفنگ میں بتایا گیا کہ ضم اضلاع میں محکمہ زراعت کے شعبہ زراعت توسیع، زراعت انجینئرنگ،زراعت ریسرچ اور سائل کنزرویشن کے مختلف منصوبوں کو پایہ تکمیل تک پہنچایا جائے گا۔ان منصوبوں سے ضم اضلاع کی بنجر اراضی کو قابل کاشت بنانے کے لیے اقدامات کیے جائیں گے۔صوبائی وزیر زراعت میجر ریٹائرڈ سجاد بارکوال نے اجلاس سے اپنے خطاب میں کہا کہ منصوبوں میں میرٹ اور شفافیت کو یقینی بنایا جائے گا اورکسی قسم کی بدعنوانی کو برداشت نہیں کیا جائے گا۔ضم اضلاع کے زمینداروں کی بہبود اولین ترجیح ہے۔ انہوں نے ضم اضلاع کے زمینداروں کو زیادہ سے زیادہ سہولیات اور آسانیاں دینے کے عزم کا اظہار کیا۔جبکہ اراکین صوبائی اسمبلی نے منصوبوں کی بہتری کے حوالے سے تجاویز بھی پیش کیں۔
 سجاد بارکوال){kind=link}