افغان حکومت میں اختلافات، وزیر داخلہ سراج حقانی مستعفی ہوگئے
کابل (ڈیلی پاکستان آن لائن )افغانستان کے وزیرداخلہ سراج الدین حقانی عہدے سے مستعفی ہوگئے۔
نجی ٹی وی جیو نیوز نے افغان میڈیا رپورٹ کے حوالے سے بتایا کہ سراج الدین حقانی نے افغان طالبان کے سربراہ ہیبت اللہ اخوندزادہ کو استعفیٰ بھجوادیا جو انہوں نے منظور کر لیا۔
میڈیا رپورٹ میں کہا گیا ہے کہ افغان حکومت کے اندرونی اختلافات کو استعفے کی وجہ بتایا جارہا ہے ۔ سراج الدین حقانی کی وزارت کی ذمہ داریوں سے طویل غیرحاضری بھی استعفے کی ایک وجہ ہے۔ حقانی نیٹ ورک اور طالبان کی مرکزی قیادت کے درمیان خواتین کے حقوق کے معاملے پر بھی اختلافات ہیں۔سراج الدین حقانی کے مستعفی ہونے سے متعلق طالبان حکومت کا کوئی بیان نہیں آیا۔
دوسری جانب افغان طالبان کی جانب سے سراج الدین حقانی کے مستعفی ہونے کی تصدیق یا تردید نہیں ہوسکی ہے۔ گزشتہ روز سراج الدین حقانی نے صوبہ خوست کا دورہ کیا تھا اور جمعہ کی نماز ادا کی جہاں انہوں نے شہریوں سے بھی ملاقات کی تھی۔
