مسجد کے باہر آئی ای ڈی دھماکے میں زخمی مفتی منیر شاکر دم توڑ گئے

پشاور(ڈیلی پاکستان آن لائن)پشاور کے علاقے ارمڑ میں مسجد کے باہر آئی ای ڈی دھماکے میں زخمی ہونیوالے مفتی منیر شاکر اسپتال میں دم توڑ گئے۔

پولیس کا کہنا ہے کہ اڑمر دھماکے کے زخمی مفتی منیر شاکر ہسپتال میں دم توڑ گئے، مسجد کے باہر دھماکے میں 4 افراد زخمی ہوئے تھے، دھماکے کے تین زخمی اسپتال میں زیر علاج ہیں۔ترجمان ایل آر ایچ عاصم کا کہنا ہے کہ مفتی منیر شاکر کو تشویشناک حالت میں ہسپتال لایا گیا تھا، مفتی منیر شاکر زخموں کی تاب نہ لاتے ہوئے چل بسے۔

ہسپتال انتظامیہ کا کہنا ہے کہ مفتی منیر شاکر کا جسد خاکی اسپتال سے گھر منتقل کیا جا رہا ہے۔اس سے قبل  پولیس کا کہنا تھا کہ زخمیوں کو ہسپتال منتقل کردیا گیا ہے، دھماکے سے مسجد کی دیوار کو جزوی نقصان پہنچا۔بم ڈسپوزل اسکواڈ کا عملہ دھماکے کی جگہ سے شواہد اکٹھے کررہا ہے۔