راولپنڈی اور جہلم میں موسلادھار بارش، مختلف واقعات میں3 افراد جاں بحق
راولپنڈی(ڈیلی پاکستان آن لائن) راولپنڈی اور جہلم میں آندھی اور طوفان کے ساتھ موسلادھار بارش کے باعث دیواریں گرنے کے واقعات میں3 افراد جاں بحق اور8 زخمی ہو گئے۔
جہلم کی تحصیل سوہاوہ میں طوفانی بارش کے دوران دیواریں گرنے کے3 واقعات میں2 افراد جاں بحق اور8 زخمی ہوگئے، نواحی علاقے محلہ شہیداں میں لوڈر گاڑی پر ڈیرے کی دیوار گر گئی جس سے 2افراد موقع پر جاں بحق اور 4 زخمی ہوئے جنہیں راولپنڈی ہسپتال بھیج دیا گیا ہے جن میں2 کی حالت تشویشناک ہے۔دیوار گرنے کا دوسرا واقعہ پڑی درویزہ میں پیش آیا جس میں ایک خاتون شدید زخمی ہوئیں ، نواحی علاقہ سہالہ میں دیوار گرنے کے تیسرے واقعہ میں ایک بچہ اور نوجوان شدید زخمی ہوئے۔
راولپنڈی کے تھانہ رتہ امرال کے علاقہ میں مسجد کی دیوار گرنے سے ملبے تلے دب کر 24سالہ موسیٰ جاں بحق ہوگیا جس کا تعلق ہزارہ کالونی سے ہے، لاش ہسپتال منتقل کر دی گئی ہے۔
