گوادر بندر گا ہ کی حفاظت کیلئے جدید ہتھیاروں سے لیس 2چینی بحری جہاز پاکستان کے سپرد

گوادر(اے این این) پاک چین اقتصادی راہداری منصوبے کے سمندری راستے کی حفاظت کیلئے چین نے دو بحری جہاز پاکستان نیوی کے حوالے کردیے۔دونوں بحری جہاز چین میں تیار کیے گئے ہیں اور انھیں جدید ہتھیاروں سے لیس کیا گیا ہے جبکہ دونوں بحری جہاز پاکستان نیوی کے دستے کا حصہ ہوں گے۔گوادر پہنچنے والے چینی حکام نے ایک تقریب کے دوران دونوں بحری جہاز پاکستانی ہم منصب کے حوالے کیے۔اس موقع پر بحری جہازوں اور ان کے چینی عملے کا شاندار استقبال کیا گیا۔پاکستان فلیٹ کے کمانڈر وائس ایڈمرل عارف اللہ حسینی نے چین سے آنے والے دونوں بحری جہازوں ہنگول اور باسول کو وصول کیا۔تقریب میں پاکستان میری ٹائمز سیکیورٹی ایجنسی کے ڈائریکٹر جنرل ریئر ایڈمرل جمیل اختر، کمانڈر ویسٹ کموڈور محمد وارثی اور اعلی نیوی اور سول حکام بھی شریک تھے۔تقریب سے خطاب کے دوران وائس ایڈمرل عارف اللہ حسینی کا کہنا تھا کہ اقتصادی راہداری ایک حقیقت ہے، یہ پاکستان اور چین کے لیے گیم چینجر ثابت ہوگا اور پورا خطہ اس سے فائدہ حاصل کرسکے گا۔انھوں نے کہا کہ 'راہداری منصوبے کے ذریعے سے بلوچستان میں ترقی کے نیا دور کا آغاز ہوگا اور یہ یہاں کے نوجوانوں کیلئے ہزاروں نوکریا بھی فراہم کرے گا'۔انھوں نے چین کے بحری جہازوں کا پاکستان نیوی کا حصہ بننے کو ایک تاریخی لمحہ قرار دیتے ہوئے کہا کہ یہ بحری جہاز گوادر پورٹ کی سیکیورٹی اور سی پیک کے سمندری راستے کی حفاظت کیلئے تعینات کیے جائیں گے۔انہوں نے مزید کہاکہ چینی حکومت پاک بحریہ کو مزید دو جہاز فراہم کرے گی، انکی تکمیل چین میں جاری ہے۔
بحری جہاز