پاناما میں ملک گیر بلیک آؤٹ، پورا ملک تاریکی میں ڈوب گیا 

پاناما سٹی (ڈیلی پاکستان آن لائن) وسطی امریکہ کے ملک پاناما میں رات گئے بجلی کے ملک گیر بلیک آؤٹ کے بعد حکام بجلی کی بحالی کے لیے جدوجہد کر رہے ہیں۔ یہ بلیک آؤٹ آدھی رات سے کچھ دیر قبل اس وقت ہوا جب ایک نجی جنریٹر کو نقصان پہنچا، جس کی تصدیق صدر ہوزے راؤل مولینو نے کی ہے۔

خبر ایجنسی اے ایف پی کے مطابق بجلی کی فراہمی معطل ہونے کے باعث پینے کے پانی تک رسائی بھی متاثر ہوئی، کیونکہ واٹر ٹریٹمنٹ پلانٹس کام نہیں کر سکے۔ انسٹی ٹیوٹ آف ایکوڈکٹس اینڈ سیورز (IDAAN) نے تصدیق کی کہ پانی کی سپلائی معطل ہوگئی ہے۔

صدر مولینو نے سوشل میڈیا پلیٹ فارم ایکس پر ایک ویڈیو پوسٹ کی جس میں انہوں نے بتایا کہ پاناما سٹی کے جنوب مغرب میں واقع ایک تنصیب میں دھماکہ ہوا ہے جس کی وجہ سے بجلی کا نظام متاثر ہوا۔ انہوں نے کہا کہ بجلی کی بحالی کا کام جاری ہے اور آہستہ آہستہ بجلی کی فراہمی بحال کی جائے گی۔ ساتھ ہی انہوں نے اس واقعے پر تفصیلی رپورٹ طلب کر لی ہے۔

خیال رہے کہ پاناما اپنی مشہور نہر کی وجہ سے دنیا بھر میں جانا جاتا ہے۔ حالیہ دنوں میں امریکی صدر ڈونلڈ ٹرمپ کی جانب سے پاناما کینال پر قبضے کی دھمکیوں کی وجہ سے پاناما خبروں میں ہے۔