سی پیک میں غیر ملکی سرمایہ کاری معاشی استحکام کا باعث بنے گی، خلدون جاوید ملک
لاہور(کامرس رپورٹر)چیئرمین لاہور ٹاؤن شپ انڈسٹریز ایسوسی ایشن خلدون جاویدملک نے کہا ہے کہ سی پیک گیم چینجر منصوبہ ہے جس میں دنیا بھر کے سرمایہ کاردلچسپی لے رہے ہیں سی پیک میں غیر ملکی سرمایہ کاری ملک میں معاشی استحکام کا باعث بنے گی انہوں نے برطانیہ کی جانب سے سی پیک کے انفراسٹرکچر کے شعبہ میں میں اربوں روپے کی سرمایہ کاری کو خوش آئند قرار دیتے ہوئے کہا ہے کہ برطانیہ اور پاکستان میں تجارت کا حجم300ارب روپے سے زائد ہے ۔جبکہ یو کے ٹریڈ انوسٹمنٹ کے ذریعے پاکستان میں اربوں روپے کی سرمایہ کاری کی جاچکی ہے ۔حال ہی میں برطانیہ کی بڑی چین نے کراچی میں کاروبار کا آغاز کردیا ہے ۔ ان خیالات کا اظہار انہوں نے سینئر وائس چیئرمین ڈاکٹر شفیق اے نقی وائس چیئرمین میاں شہریار علیکے ساتھ ٹاؤن شپ انڈسٹریز کے صنعتکاروں کے مختلف وفود سے گفتگو کرتے ہوئے کیا۔ خلدون جاوید ملک نے کہا کہ سی پیک کے ذریعے پاکستان کی معاشی و سماجی ترقی کے ساتھ ساتھ انتہا پسندی کو کنٹرول کرنے میں بھی مدد ملے گی ۔
اس حوالے سے برطانیہ کا ڈیپارنمنٹ فار انٹرنیشنل ڈویلپمنٹ تعلیم و دیگر شعبوں میں اربوں روپے خرچ کررہا ہے ۔برطانیہ نے بریگزٹ کے بعد پاکستانی تاجروں کیلئے یورپی یونین کی طرح بہترین تجارتی پالیسیاں متعارف کرانے پر کام مکمل کرلیا ہے ۔انہوں نے کہا کہ دونوں ملکوں میں تجارتی سرگرمیوں میں اضافہ سے ملک کے اندر نئی صنعتوں کا قیام عمل میں آئے گا ۔اور ملک میں نئی ملازمتوں کے وافر مواقع دستیاب ہونگے اور ملک خوشحالی و ترقی کی راہوں پر گامزن ہوگا۔
