گداگروں نے اسلام آباد ایئرپورٹ پر ڈیرے ڈال لیے
اسلام آباد (آئی این پی)رمضان المبارک کے مہینے میں پیشہ ور گداگروں نے اسلام آباد انٹرنیشنل ائیرپورٹ پر ڈیرے ڈال لیے اور لوگوں کو تنگ کرنا شروع کر دیاہے۔
تفصیلات کے مطابق وزیٹر کا بھیس بدل کر ائیرپورٹ میں داخل ہونے والے گداگروں نے بیرون ملک سے آنے والے مسافروں کو تنگ کرنا شروع کردیا۔اسلام آباد ائیرپورٹ کے پارکنگ ایریا اور انٹرنیشنل ارائیول لاؤنج کے سامنے خواتین گداگروں کی بڑی تعداد موجود رہتی ہے۔ جو مسافر وں اور انکو رخصت کرنے والی فیملی کیلئے وبال جان بن جاتے ہیں۔
اس حوالے سے ایئر پورٹ انتظامیہ کے مطابق گداگروں کے خلاف روزانہ کی بنیادوں پر ویجلنس ٹیمیں آپریشن کررہی ہیں، ویجلنس ٹیم گداگروں کو پکڑ کر پولیس کے حوالے کردیتی ہے۔ائیرپورٹ منیجر کا کہنا ہے کہ ایک ہفتے میں 30 سے زائد گداگروں کے خلاف کارروائی کی گئی اور انہیں حوالۂ پولیس کیا گیا۔
