لاہور میں پکڑے گئے خودکش بمبار نے دوران تفتیش اہم انکشافات کر دیئے

لاہور (ویب ڈیسک) لاہور کے علاقے برکی سے پکڑے جانے والے خودکش بمبار نے دوران تفتیش اہم انکشافات کر دیئے۔ خودکش بمبار کو جماعت الحرار کے کمانڈر سلیمان اور قاسم خراسانی نے ٹریننگ کے بعد چمن کے راستے پاکستان بھجوایا۔

نجی ٹی وی "آج نیوز" کے مطابق ترجمان سی ٹی ڈی نے بتایا ہے کہ برکی سے خودکش بمبار سے تفتیش کی گئی ہے، گرفتار بمبار کو افغانستان میں ٹریننگ دی گئی، خودکش بمبار کو جماعت الحرار کے کمانڈر سلیمان اور قاسم خراسانی نے ٹریننگ کے بعد چمن کے راستے پاکستان بھجوایا۔

ترجمان سی ٹی ڈی کے مطابق قاسم خراسانی پولیس لائن پشاور اور لاہور میں پولیس افسران کی ٹارگٹ کلنگ کا ماسٹرمائنڈ ہے، گرفتار خودکش بمبار شمس اللہ نے بتایا کہ دوران ٹریننگ اسے نشہ آور ادویات کا استعمال بھی کروایا جاتا تھا۔

ترجمان کے مطابق مقامی سہولت کارعلی نے خودکش بمبار کو 3 دن لاہور میں قیام کروایا اور خودکش جیکٹ فرام کی، مقامی سہولت کار علی کی گرفتاری کے لیے مختلف مقامات پر خفیہ کارروائیاں کی جا رہی ہیں۔

یاد رہے کہ لاہور کے علاقے برکی روڈ کے قریب سی ٹی ڈی پولیس نے کارروائی کرتے ہوئے کالعدم تحریک طالبان کے مبینہ خودکش بمبار کو 15 مارچ گرفتار کیا تھا، جبکہ ایک دہشت گرد زخمی حالت میں فرار ہوگیا تھا۔