امریکی ویزوں کے جائزے کا عمل مکمل ہونے کی ڈیڈلائن آج نہیں:ترجمان محکمہ خارجہ
واشنگٹن (ڈیلی پاکستان آن لائن)ترجمان امریکی وزارت خارجہ ٹیمی بروس نے واضح کیا ہے کہ امریکی ویزے کے جائزے کا عمل مکمل ہونے کی ڈیڈ لائن آج نہیں ہے۔
نجی ٹی وی سما کے مطابق امریکی وزارت خارجہ کی ترجمان ٹیمی بروس نے نیوزکانفرنس کرتے ہوئے کہا کہ ٹرمپ انتظامیہ اپنے ملک اورقوم کے تحفظ کے لئے پرعزم ہے،ویزا پروسس کے ذریعے قومی سلامتی اور عوام کا تحفظ یقینی بنایا جائے گا۔
ترجمان کا یہ ردعمل ان ممالک کی فہرست کے بعد سامنے آیا ہے جن پرمختلف نوعیت کی سفری پابندیاں عائد کی جانی تھیں،فہرست میں پاکستان،افغانستان اور ایران سمیت اکتالیس ممالک کے نام شامل تھے۔
ترجمان سے وائس آف امریکا کو بند کرنے سے متعلق بھی سوال ہوا،جس پر ان کا کہنا تھا کہ صدر ڈونلڈ ٹرمپ وفاقی بیوروکریسی کم کرنے کیلئے منتخب ہوئے ہیں،ایسے سخت فیصلے کرنے پڑتے ہیں۔
