ماضی کی معروف فلمی ہیروئن سونیا خان کی شوبز میں شاندار واپسی
لاہور(فلم رپورٹر)احسن خان،سونیا خان اور نوین وقار کی نئی ڈرامہ سیریل ’’سایہ دیوار بھی نہیں‘‘ کا شاندار آغاز ہوگیا۔اس ڈرامہ سیریل کے ذریعے ماضی کی معروف فلمی ہیروئن سونیا خان کی شوبز میں شاندار واپسی ہوئی ہے انہوں نے اس پراجیکٹ میں ایک پاور فل اور پرفارمنس سے بھرپور رول ادا کیا ہے۔یہ ڈرامہ سیریل معاشرتی مسائل اور رشتوں کی اُلجھی ڈور سے گندھی ہوئی کہانی ہے جس کا مرکزی کردار شہلا ہے جو سید صاحب کو سرراہ ملی اور سید صاحب نے نہایت ناز و نعم سے اس کی پرورش کی ۔سید صاحب کے گھرانے میں ہلچل اس وقت پیدا ہوئی جب انہیں شہلا اور اپنے بیٹے حیدر کی محبت کی خبر ہوئی ۔سید صاحب نے شہلا کی شادی اپنے ہم پلہ گھرانے کے منصورسے کردی جو اسے لے کر بیرون ملک چلاگیا جہاں ان کی تین بچے پیدا ہوئے ۔منصور کی ایک ماڈل گرل شیزا میں دلچسپی کا علم ہوتے ہی شہلا نے اس سے طلاق لے لیتی ہے ۔
وہ بچے منصور کے پاس چھوڑ کر ایک عیسائی دوست سے دوسری شادی کرلیتی ہے جس سے اس کا بیٹا ولیم پیدا ہوتا ہے۔
بچے منصور کی عدم دلچسپی کا شکار ہوکر مختلف مسائل کا شکار ہوجاتے ہیں۔والدین کے فیصلے ان کے بچوں کی زندگیوں کو کس نہج پر لے جائیں گے جاننے کیلئے دیکھئے ’’سایہ دیوار بھی نہیں ‘‘ قیصرہ حیات کی تحریر کردہ میگا ڈرامہ سیریل کوشہزاد کاشمیری نے ڈائریکٹ کیا ہے جبکہ میمونہ دُرید پروڈکشنز کی پیشکش کے نمایاں اداکاروں میں احسن خان‘ نوین وقار ‘سونیا خان ،عماد عرفانی‘ نور خان‘ حنا الطاف‘ جمال شاہ‘ عرفان کھوسٹ ‘ صائمہ خان و دیگر شامل ہیں۔ اس ڈرامہ سیریل کے میڈیا کو آرڈینیٹر منہاس صغیر ہیں۔
