مریم نواز کا جناح ہسپتال کا دورہ، شہریوں کی شکایات پر ایم ایس اور پرنسپل معطل
لاہور( ڈیلی پاکستان آن لائن ) وزیراعلیٰ مریم نواز نے جناح ہسپتال کا دورہ کیا، شہریوں کی شکایات پر پرنسپل اور ایم ایس معطل کرنے کا حکم دے دیا۔
تفصیلات کے مطابق وزیراعلیٰ مریم نواز نے جناح ہسپتال کا دورہ کیا۔ بد انتظامی پر ایم ایس کو معطل کر نے کا حکم اورپرنسپل کو عہدہ چھوڑنے کی ہدایت کی۔وزیراعلی کے اچانک جناح ہسپتال پہنچنے پر شکایات کے انبار لگ گئے۔وزیراعلیٰ نے میڈیسن سٹور کا بھی معائنہ کیا۔میڈیسن سٹور میں ادویات موجودہونے کے باوجود مریضوں کو محروم رکھنے پر وزیراعلیٰ نے برہمی کا اظہار کیا۔ وزیراعلیٰ نے جناح ہسپتال ایمرجنسی وارڈ کا بھی دورہ کیا۔
وزیراعلیٰ مریم نواز نے ایمرجنسی میں مریضوں اور تیمارداروں سے بات چیت کی۔وزیراعلیٰ نے مریضوں کو ملنے والے نسخے اور میڈیسن چیک کیں۔بزرگ مریضہ نے وزیر اعلیٰ مریم نواز کو ڈھیروں دعائیں دیں۔وزیراعلیٰ نے خاتون مریضہ کو گلے لگا کر تسلی دی۔وزیراعلیٰ نے میڈیسن اور طبی ٹیسٹ کے بارے میں دریافت کیا۔جناح ہسپتال میں مریضوں نے ایمرجنسی میں ادویات نہ ملنے اور دیگر شکایات بھی کی۔
وزیراعلیٰ مریم نواز نے صفائی اور دیگر امور کا بھی جائزہ لیا۔وزیراعلیٰ نے ایمرجنسی وارڈ میں میڈیسن نہ ملنے پر ناراضی کا اظہار کیا۔
