پنجاب میں الرٹ جاری ، کن کن شہروں میں بارشوں کی پیشگوئی ہے ؟ جانیے

لاہور ( ڈیلی پاکستان آن لائن ) رمضان المبارک کے آخری عشرے میں بارشوں کی پیشگوئی کی جا رہی ہے ،پنجاب میں الرٹ جاری کر دیا گیا ہے ، کن کن شہروں میں بارشوں کی پیشگوئی ہے ؟ اس حوالے سے اہم تفصیلات سامنے آئی ہیں ۔

محکمہ موسمیات کے مطابق 25 سے 27 مارچ کے دوران صوبے کے بیشتر اضلاع میں بارشوں کی پیشگوئی ہے۔ مری، گلیات سمیت دیگر پہاڑی علاقوں میں بارش اور برفباری کی پیشگوئی ہے۔ راولپنڈی جہلم، اٹک، چکوال، سرگودھا ،میانوالی، خوشاب اور منڈی بہاءالدین میں بارشوں کی پیشگوئی کی گئی ہے۔ لاہور شیخوپورہ حافظ آباد  گجرانوالہ گجرات سیالکوٹ نارووال فیصل آباد اور ٹوبہ ٹیک سنگھ میں بھی بارشوں کا امکان ہے۔ ملتان ڈیرہ غازی خان راجن پور بہاولپور خانیوال لیہ بھکر ساہیوال اور پاکپتن میں بھی بادل برسیں گے۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ صوبے بھر کی انتظامیہ و ریسکیو اداروں کو متوقع بارشوں بارے الرٹ جاری کر دیا گیا ہے۔ شہریوں سے گزارش ہے کہ خراب موسم کی صورتحال میں غیر ضروری سفر سے گریز کریں۔ آسمانی بجلی سے بچاؤ کیلئے محفوظ مقامات پر رہیں کھلے آسمان تلے ہرگز نہ جائیں۔ پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔ ایمرجنسی صورتحال میں پی ڈی ایم اے ہیلپ لائن 1129 پر کال کریں۔