میری شادی میں شرکت کیلئے اتنی رقم دینی ہوگی، دلہن نے اپنی بچپن کی سہیلی سے خرچہ مانگ لیا، حیران کن تفصیلات سامنے آگئیں

واشنگٹن (ڈیلی پاکستان آن لائن) ایک خاتون نے اپنی قریبی سہیلی کی شادی میں اس وقت  شرکت سے انکار کر دیا جب اسے ایک حیران کن ای میل موصول ہوئی، جس میں شادی کا حصہ بننے کے لیے بھاری رقم ادا کرنے کی شرط رکھی گئی تھی۔ جب اس کی بچپن کی دوست میگن نے اسے اپنی شادی میں مدعو کیا اور  برائڈز میڈ  بننے کی درخواست کی تو یہ بہت خوش تھی۔ تاہم اس کی خوشی اس وقت حیرت میں بدل گئی جب اسے ایک تفصیلی ای میل موصول ہوئی جس میں "برائیڈز میڈ پیکج" کے اخراجات درج تھے۔

نیوز 18 کے مطابق اس ای میل میں ایک سپریڈشیٹ شامل تھی جس میں مختلف لازمی اخراجات کا ذکر تھا۔ ان میں 500 امریکی ڈالر برائیڈز میڈ کے لباس کے لیے، 300  ڈالر میک اپ اور ہیئر سٹائلنگ کے لیے، کم از کم 150  ڈالر  دلہن کے تحفے کے لیے اور 100  ڈالر  بیچلریٹ پارٹی کے لیے بطور ڈپازٹ شامل تھے۔ اس کے علاوہ ایک اضافی 50  ڈالر "متفرق اخراجات" کے تحت بھی درج تھے، جن کی وضاحت نہیں کی گئی تھی۔

یہ ای میل پڑھ کر خاتون ششدر رہ گئی اور اس نے اپنی دوست میگن سے رابطہ کیا اسے بتایا کہ وہ یہ اخراجات برداشت نہیں کر سکتی کیونکہ وہ تعلیمی قرضے اتار رہی ہے اور اپنی بچت پر دھیان دے رہی ہے۔ تاہم اس کی حیرانی اس وقت مزید بڑھ گئی جب میگن نے اپنی شرط پر اصرار کرتے ہوئے کہا، "میں سب کچھ پرفیکٹ بنانے کی کوشش کر رہی ہوں، اور یہ اخراجات ضروری ہیں۔ اگر تم میری شادی میں شرکت نہیں کر سکتیں تو میں سمجھ سکتی ہوں، لیکن میں باقی سب کے لیے اپنے منصوبے نہیں بدل سکتی۔"

اپنی بہترین دوست کی یہ بات سن کر خاتون کو شدید عجیب محسوس ہوا اور اس نے اپنی پریشانی کا اظہار ریڈٹ پر کیا۔ اس نے لکھا کہ وہ ہمیشہ اپنی دوست کے ساتھ کھڑی رہی، لیکن ایسا لگتا ہے کہ میگن اپنی شادی کو ایک بہانہ بنا کر مہمانوں سے رقم وصول کر رہی ہے۔ اس نے مزید کہا کہ جب اس نے میگن کو بتایا کہ وہ یہ تمام اخراجات برداشت نہیں کر سکتی تو اس کے بعد سے میگن نے اس سے کوئی رابطہ نہیں کیا۔