گندم کے کاشتکاروں کیلیے ایک ہزار مفت ٹریکٹر سکیم کی قرعہ اندازی,وزیر اعلیٰ نے کسانوں کوفون کر کے مبارکباد دی

لاہور(ڈیلی پاکستان آن لائن)پنجاب کے کاشتکار کیلئے گرین ٹریکٹر، کسان کارڈ، سپر سیڈر سمیت بے شمار پراجیکٹ کے بعد گندم اگانے والے کاشتکاروں کو ایک ہزار مفت ٹریکٹر دئیے جائیں گے۔

تفصیلات کے مطابق وزیراعلیٰ مریم نواز نے”وزیراعلیٰ پنجاب وِیٹ این سینٹیو پروگرام“ کے تحت گندم کے کاشتکاروں کے لیے ایک ہزار مفت ٹریکٹر سکیم کی قرعہ اندازی کرکے باقاعدہ آغاز کر دیا۔ وزیر اعلیٰ مریم نواز نے کاشتکاروں کے لیے مفت ٹریکٹرپروگرام کابٹن دبا کر ”گندم اگاؤ“ انعامی سکیم کے لئے ڈیجیٹل قرعہ اندازی کی۔ گندم اگاؤ مہم میں سب سے پہلا ٹریکٹر بہاولنگر کی خاتون کاشتکار کوثر پروین کا نکلا۔

 وزیراعلیٰ مریم نواز نے خود فون کرکے کامیاب کاشتکاروں کو مفت ٹریکٹرملنے کی مبارکباد دی۔ وزیراعلیٰ  نے جھنگ کے محمد اقبال کو بھی خود فون کرکے ڈیجیٹل قرعہ اندازی کے تحت مفت ٹریکٹر نکلنے پرمبارکباد دی جس پر کاشتکار نے وزیراعلیٰ  کا خود فون کرنے پر شکریہ ادا کیا۔ وزیراعلیٰ  نے منڈی بہاؤالدین کے کامیاب کاشتکار سلمان احمد سے فون کرکے بتایا کہ گندم اگاؤ قرعہ اندازی میں آپ کا مفت ٹریکٹر نکلا ہے جس پر سوچا کہ آپ کو خود مبارکباد دوں۔ پنجاب کے کاشتکار کے لیے گرین، ٹریکٹر، کسان کارڈ، سپر سیڈر سمیت بے شمار پراجیکٹس لانچ کیے ہیں۔گندم کی فصل ان شا ء اللہ اچھی ہوگی میری عائیں کاشتکار بھائیوں کے ساتھ ہیں۔

 وزیراعلیٰ مریم نوز کوبریفنگ میں بتایاگیا کہ”گندم اگاؤ“ مہم میں مفت ٹریکٹرسکیم کے لئے ساڑھے 12 ایکڑ سے57733زائد اراضی مالک کاشتکاروں نے اپلائی کیا۔ جانچ پڑتال کے بعد 21496 کاشتکار قرعہ اندازی کے لیے اہل قرار پائے۔ قرعہ اندازی میں کامیاب ایک ہزار کاشت کاروں کو 55 ہارس پاور کے ٹریکٹر مفت دئیے جائیں گے۔3 ماہ کے اندر تمام کاشتکاروں کو ٹریکٹر کی فراہمی شروع ہو جائے گی.

بریفنگ میں مزید بتایا گیا کہ پنجاب میں 5لاکھ60ہزار ایکٹر اراضی پر گندم کاشت کی گئی۔