پی ٹی آئی سےمذاکرات ...رانا ثناء اللہ نے بلاول بھٹو کی" ثالثی کی پیشکش" کا جواب دیدیا
اسلام آباد ( ڈیلی پاکستان آن لائن )پی ٹی آئی سےمذاکرات کے حوالے سے وزیراعظم کے مشیر برائے سیاسی امور رانا ثناء اللہ نے پیپلز پارٹی کے چیئرمین بلاول بھٹو زرداری کی" ثالثی کی پیشکش" کا جواب دیدیا ۔
تفصیلات کے مطابق وزیراعظم کے مشیر برائے سیاسی امور رانا ثناء اللّٰہ نے" جیو نیوز" سے گفتگو میں کہا کہ بلاول بھٹو پی ٹی آئی سے بات کرلیں، حکومت کو کوئی اعتراض نہیں۔اگر بلاول بھٹو زرداری تحریک انصاف سے اجلاس میں شرکت کی یقین دہانی حاصل کرلیں تو قومی سلامتی کمیٹی کا اجلاس دوبارہ بلانے میں کوئی حرج نہیں۔ بلاول بھٹو زرداری خود حکومت میں ہیں اگر پی ٹی آئی اور حکومت کے درمیان مذاکرات میں کامیاب ہوجاتے ہیں تو یہ ہماری ہی کامیابی ہوگی۔ دہشت گردی اہم معاملہ ہے، اس پر جتنی گفتگو ہو اچھی بات ہے۔
ایک سوال پر وزیراعظم کے مشیر نے یہ بھی کہا کہ پیکا قانون کے غلط استعمال کی شکایت کسی حد تک درست ہے، ضرورت ہے قانون کے غلط استعمال کو روکا جائے۔
