ایئر چیف سےپاک فضائیہ کی مشترکہ مشق "انڈس شیلڈ 2024" کے موقع پر سری لنکن ایئر چیف کی ملاقات
اسلام آباد (ڈیلی پاکستان آن لائن) پاک فضائیہ کی مشترکہ مشق "انڈس شیلڈ 2024" کا انعقاد ہوا، جس میں مختلف اتحادی ممالک کے ایئر چیفس اور اعلیٰ عسکری حکام نے شرکت کی۔ اس مشق نے پاک فضائیہ کی کثیرالجہتی جنگی صلاحیتوں کو اجاگر کیا اور فضائی افواج کے مابین عالمی تعاون کی اہمیت کو مزید مستحکم کیا۔
آئی ایس پی آر کے مطابق سری لنکن ایئر فورس کے کمانڈر، ایئر مارشل راجا پکسا اپوہامیلاگے اُدینی پریادرشنا راجا پکسا نے اپنے دورے کے دوران ایئر چیف مارشل ظہیر احمد بابر سدھوسے ایئر ہیڈکوارٹرز اسلام آباد میں ملاقات کی۔ ملاقات میں علاقائی سلامتی کے تناظر میں عملی امور سمیت مختلف موضوعات پر گفتگو ہوئی۔
ایئر ہیڈکوارٹرز پہنچنے پر سری لنکن ایئر چیف کو پاک فضائیہ کے چاق و چوبند دستے نے گارڈ آف آنر پیش کیا۔ ملاقات کے دوران سربراہ پاک فضائیہ نے پاک فضائیہ کے جاری جدیدیت کے منصوبے، عملی مقاصد اور مستقبل کی جنگ کے لیے فورس کی ساخت کے اہداف پر روشنی ڈالی۔ ایئر چیف نے سری لنکن ایئر فورس کے نمائندوں کی مشق انڈس شیلڈ میں شرکت کی تعریف کی اور دونوں ممالک کے مابین مضبوط دوستانہ تعلقات خاص طور پر عسکری تعاون، تربیت اور مرمت کی معاونت کو مزید فروغ دینے کے عزم کا اعادہ کیا۔
سری لنکن ایئر فورس کے کمانڈر نے پاک فضائیہ کی خود انحصاری اور اس کی موجودہ قیادت کے تحت اسٹریٹجک تبدیلی کی تعریف کی۔ انہوں نے انڈس شیلڈ 2024 کو ایک عالمی معیار کی مشق قرار دیا، جس میں تربیتی فوائد اور کثیرالجہتی عملی معیار شامل تھے۔ مہمان نے پاک فضائیہ کے اہلکاروں کی پیشہ ورانہ مہارت اور اس مشق کی کامیاب تنظیم و عمل درآمد کی بھی تعریف کی۔ سری لنکن ایئر چیف نے دونوں ممالک کے مابین تربیت اور سری لنکن ایئر فورس کی صلاحیت بڑھانے کے شعبے میں مزید تعاون کو فروغ دینے کی خواہش کا اظہار کیا۔
پاک فضائیہ کے سربراہ نے سری لنکن ایئر فورس کو ہر ممکن معاونت فراہم کرنے کی یقین دہانی کرائی۔
بعدازاں، معززمہمان نے نیشنل ایرو اسپیس سائنس اینڈ ٹیکنالوجی پارک، نیشنل آئی ایس آر اور مربوط فضائی آپریشنز سینٹر اور پاک فضائیہ کے سائبر کمانڈ کا دورہ کیا، جہاں انہیں پاک فضائیہ کی عملی صلاحیتوں کے بارے میں تفصیلی بریفنگ دی گئی۔
آئی ایس پی آر کا کہنا ہے کہ پاک فضائیہ اور سری لنکن ایئر فورس کے سربراہان کے درمیان ملاقات دونوں ممالک کی فضائی افواج کے درمیان تعاون کو مزید مضبوط کرنے کے عزم کی علامت ہے، جو علاقائی امن اور استحکام میں معاون ثابت ہوگا۔
