یہودی آباد کاروں نے مسجد اقصیٰ پر حملہ کردیا
بیت المقدس (ڈیلی پاکستان آن لائن) یہودی آباد کاروں نے اسرائیلی پولیس کی سرپرستی میں مسجد اقصیٰ پر حملہ کردیا۔
عرب میڈیا کے مطابق سینکڑوں یہودی آبادکاروں نے ’’کفارہ کی عید‘‘ کی یاد میں مسجد اقصیٰ میں داخل ہوگئے اور مسلمانوں کو نکالنے کی کوشش کی، مسجد اقصیٰ میں داخل ہوکر ہلڑ بازی کرنے والے یہودی آبادکاروں کی تعداد 600 سے زائد تھی۔ جنھوں نے مقدس مسجد کے صحن میں نعرے بازی کی اور مسلمانوں کو عبادت سے روکا۔ اس موقع پر اسرائیلی پولیس یہودی آبادکاروں کی محافظ بنی رہی۔ یہودی آبادکاروں نے مسجد اقصیٰ کی بیحرمتی کی اور جوتوں سمیت صحن میں داخل ہوئے۔ شور شرابے اور نعرے بازی سے نمازیوں کی عبادت میں خلل پیدا ہوا۔فلسطینی صدر محمود عباس نے یہودی آبادکاروں کے مسجد اقصیٰ پر حملے کی مذمت کرتے ہوئے کہا کہ اسرائیل نے ایک بار پھر اردن کی ثالثی میں ہونے والے مذاکرات کی خلاف ورزی کی ہے۔ علاوہ ازیں مصر اور قطر سمیت کئی ممالک نے یہودی آبادکاروں کے مسجد اقصیٰ پر اسرائیل کو تنقید کا نشانہ بنایا ہے۔
