بارشوں کی کمی, چاول کی پیداوار متاثر ہونے کا اندیشہ، ممکنہ خشک سالی سے نمٹنے کیلیے پی ڈی ایم اے پنجاب نے تیاری کر لی
لاہور ( ڈیلی پاکستان آن لائن )بارشوں کی کمی کے باعث ممکنہ خشک سالی سے نمٹنے کے لیے پی ڈی ایم اے پنجاب نے تیاری کر لی ۔
تفصیلات کے مطابق بارشوں کی کمی کے باعث ممکنہ خشک سالی سے نمٹنے کےلئے پی ڈی ایم اے نے کمر کس لی۔ پی ڈی ایم اے پنجاب نے صوبے بھر کے کمشنر ڈی سیز اور متعلقہ اداروں کو مراسلہ جاری کر دیا۔ محکمہ موسمیات کی رپورٹ کے مطابق پنجاب میں موسم سرما میں 38 فی صد بارشیں کم ہوئیں۔ بہاولپور پور، بہاولنگر اور رحیم یار خان میں خشک سالی کا امکان زیادہ ہے۔ بارشوں کی کمی سے ربیع سزین کی فصلیں متاثر ہو سکتی ہیں۔ چاول کی پیداوار متاثر ہونے سے کسانوں کو نقصان کا اندیشہ ہے۔
ڈائریکٹر جنرل پی ڈی ایم اے عرفان علی کاٹھیا کا کہنا تھا کہ کسانوں کو ممکنہ آبی قلت کے خدشے کےبارے میں پیشگی آگاہ کیا جائے۔ تھل اور چولستان میں پانی کی متوقع کمی کے پیشِ نظر پیشگی انتظامات مکمل اور انتظامیہ الرٹ رہے۔ شعوری مہم میں سکول ایجوکیشن ڈیپارٹمنٹ کو بھی حصہ بنایا جائے گا۔ احتیاطی تدابیر سے فصلوں کو ہونے والے نقصان سے بچایا جا سکتا ہے۔ ممکنہ آبی قلت سے نمٹنا سب کی ذمہ داری ہے۔
