مردان، دہشتگردوں کیخلاف آپریشن، ایس پی اعجاز خان شہید، 2 ملزمان ہلاک

مردان (ویب ڈیسک) خیبر پختون خوا کے ضلع مردان کے علاقے کاٹلنگ میں دہشت گردوں کے خلاف انٹیلی جنس بیسڈ آپریشن کیا گیا ہے۔

پولیس کے مطابق مردان میں دہشت گردوں نے پولیس پر فائرنگ کر دی،جس کے نتیجے میں ایس پی اعجاز خان شہید ہو گئے۔سی ٹی ڈی کے ذرائع نے بتایا ہے کہ فائرنگ سے ڈی ایس پی اور 2 اہلکار شدید زخمی بھی ہوئے ہیں۔فائرنگ سے زخمی ڈی ایس پی اور 2 اہلکاروں کو ہسپتال منتقل کر دیا گیا ہے۔

پولیس ذرائع نے بتایا ہے کہ آپریشن میں پولیس کو انتہائی مطلوب دہشت گرد محسن سمیت 2 دہشت گرد مارے گئے۔علاوہ ازیں مردان میں دہشت گردوں کی فائرنگ سے شہید ہونے والے ایس پی اعجاز خان کی نمازِ جنازہ ادا کر دی گئی۔مردان پولیس لائنز میں نمازِجنازہ میں ڈی پی او مردان نجیب اور دیگر پولیس حکام نے شرکت کی۔