نور الامین مینگل کا سینٹرل جیل لاہور کا دورہ، جیل انڈسٹری میں تیار کردہ مصنوعات کی نمائش کا جائزہ لیا

لاہور ( ڈیلی پاکستان آن لائن )سیکرٹری داخلہ پنجاب نور الامین مینگل نے سینٹرل جیل لاہور کا دورہ کیا اور پنجاب بھر کی جیل انڈسٹری میں تیار کردہ مصنوعات کی نمائش کا جائزہ لیا۔ آئی جی جیل خانہ جات میاں فاروق نذیر، ایڈیشنل سیکرٹری پریزن عاصم رضا، ڈی آئی جی لاہور ریجن نوید رؤف، جیل سپرنٹنڈنٹ اعجاز اصغر اور صحافیوں کی بڑی تعداد بھی اس موقع پر موجود تھی۔ سیکرٹری داخلہ نے جیلوں میں تیار کردہ کارپٹ، ٹف ٹائل، فرنیچر، صابن، فینائل، ایل ای ڈی بلب، جوتے، دستانے، فٹ بال، کپڑے اور ٹرنک کا جائزہ لیا۔

 اس موقع پر گفتگو کرتے ہوئے سیکرٹری داخلہ پنجاب نور الامین مینگل کا کہنا تھا کہ محکمہ داخلہ قیدیوں کی بحالی، ہنر مندی اور انکی سماجی و معاشی ترقی کیلئے ٹھوس اقدامات  کررہا ہے۔ اسیران کو ہنر سکھا کر باعزت روزگار کے قابل بنا رہے ہیں۔ جیل انڈسٹری میں قیدی ہنر سیکھنے کیساتھ رہائی کے بعد معاشی خودمختاری کے قابل ہو رہے ہیں۔ انہوں نے کہا کہ رویئے میں اس تبدیلی سے قیدی دوبارہ جرم کی طرف مائل نہیں ہونگے۔

 ایک سوال کے جواب میں سیکرٹری داخلہ پنجاب نے بتایا کہ قیدیوں کی بنائی گئی مصنوعات کی تشہیر اور مارکیٹ میں فروخت کر رہے ہیں۔ تمام جیلوں کے باہر مصنوعات کی نمائش اور فروخت کیلئے ڈسپلے سینٹرز قائم کیے ہیں۔ انہوں نے بتایا کہ شہری ویب سائٹ www.prisonstore.com.pk اور موبائل ایپ "Prison Store" سے مصنوعات دیکھ سکتے ہیں۔

 سیکرٹری داخلہ پنجاب کا کہنا تھا کہ نجی شعبے کو جیل انڈسٹری میں سرمایہ کاری کے مواقع فراہم کیے ہیں اور جیل انڈسٹری سے حاصل ہونے والی آمدنی بطور معاوضہ قیدیوں کے جیل بینک اکاؤنٹ میں جمع ہوتی ہے۔