کراچی میں ملازموں نے مالک کا قتل کردیا ، پیسے لے کر فرار

کراچی (ڈیلی پاکستان آن لائن) بھینس کالونی میں باڑے کے مالک کو قتل کرنے کے بعد باڑے میں ہی دفنا دیا گیا جبکہ مقتول نے چند روزقبل کچھ مویشی فروخت کیے تھے اور اس کے پاس بڑی رقم موجود تھی رقم اور باڑے میں کام کرنے والے ملازم غائب ہیں۔

رپورٹ کے مطابق سکھن تھانے کے علاقے بھینس کالونی میں باڑے کے 70 سالہ مالک حاجی اخلاق احمد قریشی کو قتل کرنے کے بعد باڑے میں ہی دفنا دیا، سکھن پولیس نے تین روز کے بعد 15 پولیس کو اطلاع ملنے پرباڑے میں کھدائی کرکے مقتول باڑے کی لاش نکال لی۔ایس ایچ او سکھن عدیل شاہ نے ایکسپریس کو بتایا کہ مقتول مالک حاجی اخلاق احمد قریشی تین روز سے لا پتہ تھا لیکن ان کے لا پتہ ہونے کے حوالے سے پولیس کو آگاہ نہیں کیا گیا۔

تین روزکے بعد ان کے منشی عبد الحمید اور ڈرائیورعرفان گجر نےمددگار 15 پولیس کودی جس پر پولیس بھینس کالونی روڈ نمبر7 بلال مسجد کے قریب حاجی مقتول کے باڑے پہنچی توباڑے میں تعین اٹھ رہا تھا۔پولیس نے کھدائی شروع کرائی تو زیرزمین سے مقتول مالک حاجی اخلاق احمد قریشی کی تین روز پرانی لاش نکال کر قانونی کارروائی کے لیے جناح ہسپتال منتقل کردی گئی۔

مقتول باڑے میں اکیلا رہتا تھا اور فیملی پنجاب میں رہائش پذیر ہے، انہوں نے بتایا کہ مقتول باڑے کے مالک نے چند روزقبل کچھ مویشی فروخت کیے تھے، مقتول مالک کے پاس بڑی رقم موجود تھی، مقتول کی رقم اورباڑے میں کام کرنے والے ملازم غائب ہیں، باڑے میں کام کرنے والے ملازموں میں زاہد ، نورو اورعرفان شامل ہیں۔

تینوں ملزمان آپس میں سگے بھائی بتائے جاتے ہیں، شبہ ہے کہ باڑے میں کام کرنے والے ملازموں نے ہی مقتول حاجی اخلاق احمد قریشی کو قتل کیا اوربعد ازاں  لاش باڑے میں دفنا کر فرار ہو گئے۔انہوں نے بتایا کہ مقتول کی لاش کا پوسٹ مارٹم کروایا جائے گا تاکہ حتمی طور پر وجہ موت کا تعین ہوسکے، ایس ایچ او نے بتایا کہ پولیس نے  باڑے میں کام کرنے والے ملازموں کی تلاش شروع کردی ہے۔