پیپلزپارٹی آج لسبیلہ اور راولپنڈی میں سیاسی پاور شو کرے گی

لسبیلہ(ڈیلی پاکستان آن لائن) پاکستان پیپلزپارٹی آج لسبیلہ اور راولپنڈی میں سیاسی پاور شو کا مظاہرہ کرے گی،لسبیلہ میں ہونے والے جلسہ عام سے سابق صدر آصف علی زرداری خطاب کریں گے۔

نجی ٹی وی چینل دنیا نیوز کے مطابق پاکستان پیپلز پارٹی پی بی 21 حب کے نامزد امیدوار میر علی حسن زہری جلسہ گاہ کی تیاریوں کے فرائض سرانجام دے رہے ہیں، جلسہ گاہ میں قائدین کے بیٹھنے کیلئے 27 فٹ چوڑا اور 120 فٹ لمبا سٹیج تیار کیا گیا ہے۔جلسہ گاہ میں جیالوں کے بیٹھنے کیلئے 1 لاکھ کرسیاں لگائی گئیں ہیں جبکہ سکیورٹی کیلئے ایک ہزار سے زائد پولیس اہلکار تعینات کئے گئے ہیں۔

دوسری جانب پیپلزپارٹی راولپنڈی میں بھی سیاسی میدان لگائے گی،پیپلزپارٹی کا جلسہ لیاقت باغ راولپنڈی میں ہوگا، جلسہ سے چیئرمین پی پی بلاول بھٹو زرداری اور مقامی قائدین خطاب کریں گے۔