جیل میں قید حنیف عباسی کی طبیعت شدید خراب ہو گئی، تشویشناک خبر نے ن لیگی رہنماؤں کو پریشان کر دیا

لاہور (ڈیلی پاکستان آن لائن) پاکستان مسلم لیگ (ن) کے رہنماءحنیف عباسی کی طبیعت شدید خراب ہو گئی ہے جس پر کیمپ جیل لاہور انتظامیہ نے انہیں پنجاب انسٹی ٹیوٹ آف کارڈیالوجی منتقل کر دیا ہے۔
نجی خبر رساں ادارے پبلک نیوز کے مطابق ایفی ڈرین کوٹہ کیس میں عمر قید کی سزا پانے والے مسلم لیگ (ن) کے رہنماءحنیف عباسی کیمپ جیل میں قید ہیں جہاں گزشتہ کئی دنوں سے ان کی طبیعت خراب تھی تاہم آج ان کی طبیعت شدید خراب ہو گئی ہے جس پر انہیں پنجاب انسٹیٹیوٹ آف کارڈیالوجی منتقل کردیا گیا ہے۔
حنیف عباسی کے اہل خانہ نے ان کی طبیعت مزید بگڑنے پر تشویش کا اظہار کرتے ہوئے کہا ہے کہ ڈاکٹرز کے مطابق ان کے دل کی ایک اور شریان بند ہو گئی ہے جبکہ اس سے قبل ان کی ایک شریان میں سٹنٹ بھی ڈالا جا چکا ہے۔