گنڈا پور کیساتھ پھر موئے موئے ہو گیا، سر پٹخ پٹخ کر واپس لوٹ گئے: عظمیٰ بخاری

                                                            لاہور(آئی این پی)وزیراطلاعات پنجاب عظمیٰ بخاری نے راولپنڈی میں پی ٹی آئی کے احتجاج سے متعلق کہا ہے گنڈاپور کیساتھ پھر موئے موئے ہوگیا، سر پٹخ پٹخ کر واپس لوٹ گیا۔میڈیا سے گفتگو کرتے ہوئے صوبائی وزیراطلاعات نے کہا پنجاب میں غنڈہ گردی نہیں قانون کی حکمرانی چلے گی، وزیر اعلی پنجاب کواپنی حکومت کی رٹ منوانی آتی ہے، فساد گرو پ والوں کیساتھ توموئے موئے ہوگیا، چلو بھاگو،جبکہ انہوں نے پنڈی میں فساد کا پروگرام بنایاتھا، کے پی کے میں سکیورٹی اداروں پر حملے ہورہے ہیں مگر وہ کرین اور فائر بریگیڈ لیکر پنڈی پر یلغار کرنا چاہتے تھے،عظمیٰ بخاری نے کہا وزیراعلی کے ہاتھ میں عام آدمی کے مسائل حل کرنے کی فائل ہونی چاہیے یا اے کے 47؟، کیا کوئی سیاسی جماعت اسلحہ کیسا تھ جلسہ کرنے آتی ہے، پنڈی میں ان کو جلسہ کرنے کی اجازت نہیں ملی تھی،دفعہ ایک سو چوالیس نافذ ہے، ادھر کے پی کے کے ضلع کرم میں لڑائی جاری ہے، جس میں پانچ افراد ابتک جاں بحق ہوچکے ہیں، حالات بدترین ہیں اور وہاں کے پیسے پنجاب پر یلغار کیلئے لگ رہے ہیں، لاتوں کے بھوت باتوں سے نہیں مانتے،ان کو دوسرے طریقے سے ٹھیک کرنا پڑیگا، ہمارے پاس یہ اطلاعات ہیں یہ شرپسندی کیسے کرنا چاہتے ہیں،ان کو ماحول خراب کرنے کی اجازت نہیں دی جائیگی، شنگھائی تعاون تنظیم اسلام آباد میں ہونے جا رہی ہے یہ اس کو نقصان پہنچانا چاہتے ہیں۔عظمیٰ بخاری نے کہا ایک سو چھبیس دن کے دھرنوں کے بعد یہ بوریا بستر لپیٹ کر نکلے تھے، اس سے پہلے پرویز خٹک بھی اسلام آباد آنے کی کوشش کرچکے ہیں، کہتے ہیں گنڈاپور پنجاب آگیا بھائی گنڈاپور اٹک کے پل سے نہیں آیا، جب اٹک کے پل سے نہیں آنے دینا تو نہیں آنے دینگے، پٹرول بم انہوں نے بچو ں کو چلانا سکھا دیئے ہیں، ہم چلانے کی اجازت نہیں دینگے۔

عظمیٰ بخاری