یقین سے خریداری، مایوسی سے واپسی: پاکستانی صارفین ٹیمو سے کیا سیکھ رہے ہیں؟

لاہور (پروموشنل ریلیز)ٹیمو (Temu) آہستہ آہستہ پاکستانی نوجوان صارفین کی توجہ حاصل کر رہا ہے، بالکل ویسے جیسے کوئی نیا کھلنے والا کافی شاپ سوشل میڈیا پر ٹرینڈ کرنے لگتا ہے۔ یہ آپ کی انسٹاگرام فیڈ پر ہے، آپ کے کزنز کے واٹس ایپ گروپز میں گردش کر رہا ہے، اور ہر چیز پر ناقابل یقین رعایتوں کے وعدے کر رہا ہے – چاہے وہ پورٹ ایبل بلینڈر ہو یا ویلویٹ کشن کور۔ چمکتے بینرز "فلیش سیل" کی دہائی دیتے ہیں، گیمز مفت انعامات کا لالچ دیتی ہیں، اور قیمتیں اتنی کم ہوتی ہیں کہ سچ لگتی ہی نہیں — اور اکثر، واقعی سچ نہیں ہوتیں۔

بہت سے پاکستانی صارفین کے لیے ٹیمو ایک جانا پہچانا تجربہ بن چکا ہے: ایسا خریداری کا تجربہ جہاں "کلیئرنس سیل" کے بہانے ناقص یا فیکٹری ریجیکٹ مال بیچا جاتا ہے، جہاں "فلیٹ 70% آف" کا مطلب اکثر کم معیار کا اسٹاک ہوتا ہے، اور جہاں آؤٹ لیٹ مالز "ڈیزائنر بارگین" کے نام پر عام اور کم درجے کی اشیاء فروخت کرتے ہیں۔

"یہ ایپ بالکل ایسے پریشر ڈالتی ہے جیسے اسے معلوم ہو کہ آپ کو کیسے قابو کرنا ہے"، اسلام آباد کی ایک یونیورسٹی طالبہ آمنہ بتاتی ہیں۔ "ہر دوسرے آئٹم کے ساتھ ایک الٹی گنتی چل رہی تھی، اور ہر صفحہ چلا چلا کر کہہ رہا تھا: 'بس ختم ہونے والا ہے'۔ میں نے موزے، ایک منی ویکیوم اور دراز آرگنائزرز خرید لیے — جو مجھے درحقیقت چاہیے ہی نہیں تھے۔ میں صرف یہ چاہتی تھی کہ موقع ضائع نہ ہو جائے اور کم از کم آرڈر کی حد پوری ہو جائے۔"

یہ پیدا کیا گیا احساسِ عجلت (urgency) کوئی اتفاقیہ بات نہیں۔ ٹیمو کا ڈیزائن انہی نفسیاتی حربوں پر مبنی ہے جیسے کسی بازار میں آخری دن کی سیل یا عید ایگزیبیشن میں "صرف آج کی خصوصی رعایت" کی آوازیں — وہ آوازیں جو آپ کو صرف ایک کُرتا خریدنے کی نیت سے آئے ہوئے شخص کو تین خریدنے پر مجبور کر دیتی ہیں۔

ایپ ایک چالاک امتزاج استعمال کرتی ہے: فلیش سیل، پاپ اپ ٹائمرز، اور گیمیفائیڈ (Gamified) شاپنگ ایکسپیرینس — جو صارفین کو ایک نہ ختم ہونے والے لوپ میں پھنسا دیتے ہیں۔ "اسپن دا وہیل" بونس زیادہ رعایتوں کا وعدہ کرتے ہیں، بشرطیکہ آپ خریداری جاری رکھیں۔ "مفت تحفے" آپ کو زیادہ خرچ کرنے پر اکساتے ہیں، لیکن ان کے تقاضے مسلسل بدلتے رہتے ہیں۔

"میں نے ایپ پر ایک گیم کھیلی اور ایک چھوٹا تحفہ منتخب کیا، یہ سمجھ کر کہ آسانی سے جیت جاؤں گی"، ملتان کی طالبہ اقراء کہتی ہیں۔ "لیکن وہ اتنا مشکل ہو گیا اور اس میں اتنے زیادہ دوستوں کو مدعو کرنا پڑا کہ میں نے ہار مان لی۔ اگر مجھے پہلے سے معلوم ہوتا تو میں وہ وقت کسی بہترکام میں لگاتی۔"

اور خریداری مکمل کرنے سے پہلے ہی، براؤزنگ کا تجربہ صارفین کو کنٹرول سے باہر محسوس کرواتا ہے۔ "جب میں نے ایک فلیش ڈیل پر ٹیپ کیا تو اس نے مجھے پروڈکٹ کی تفصیلات بھی نہیں دیکھنے دیں"، کراچی سے تعلق رکھنے والے ٹیکسٹائل ڈیزائنر حنان بتاتے ہیں۔ "بس وہ چیز سیدھی میرے کارٹ میں شامل ہو گئی۔ نہ ریویوز دیکھنے کا موقع، نہ موازنہ کرنے کی اجازت۔ جیسے وہ نہیں چاہتے کہ آپ سوچیں — بس کلک کریں اور خرید لیں۔"

یہ گویا کسی ایسی افراتفری والی وئیر ہاؤس سیل میں ہونا ہے جہاں سیلز اسٹاف آپ کے ہاتھ میں چیزیں تھما رہا ہے اس سے پہلے کہ آپ فیصلہ کر سکیں کہ آپ کو وہ چاہییں بھی یا نہیں۔

اور جب ان پرکشش قیمتوں کا جادو چل جاتا ہے؟ تو اکثر صارفین کو مایوسی ان پیک کرنی پڑتی ہے — کمزور مٹیریل، خراب سلائی والے کپڑے، اور ایسی اشیاء جو آن لائن تصویروں سے میل نہیں کھاتیں۔ ریٹرن کا آپشن تھیوری میں موجود ہے، مگر پاکستان میں عملی طور پر مشکل ہے، جہاں ٹیمو لاکھوں روپے کے ڈیجیٹل اشتہارات تو چلا رہا ہے، مگر مقامی سطح پر کسٹمر سروس جیسی بنیادی سہولتوں پر ایک پیسہ خرچ نہیں کر رہا۔

"ریٹرن کا طریقہ کار اتنا پیچیدہ لگا کہ میں نے وہ چیزیں اپنی ہاؤس ہیلپ کو دے دیں"، کراچی کی حرا بتاتی ہیں۔ "مجھے لگا جیسے دھوکہ دیا گیا ہو، لیکن میں نے سبق سیکھ لیا۔ مجھے اپنی امی کی وہ نصیحت یاد آ گئی کہ آن لائن خریداری کرتے وقت احتیاط کرنی چاہیے۔"

مایوسی کے ساتھ خریداری کا یہ ملا جلا تجربہ اب پاکستانی صارفین کے لیے نیا نہیں رہا۔ یہ سب ویسا ہی لگتا ہے جیسا مقامی دھوکے: شاپنگ مالز کے باہر بیچی جانے والی نقلی برانڈڈ جوتیاں، انسٹاگرام بوتیکس کی جعلی تصاویر، اور "اورجینل ریپلیکا" کے نام پر بیچے جانے والے مہنگے نقلی کپڑے۔

ٹیمو کے ساتھ مسئلہ یہ ہے کہ یہ انہی پرانے ہتھکنڈوں کو نئی، چمکدار، ڈیجیٹل دنیا میں لے آیا ہے۔ یہ معتبر لگتا ہے۔ یہ بین الاقوامی دکھائی دیتا ہے۔ لیکن اندر سے یہ وہی پرانی چالیں استعمال کرتا ہے: جذباتی دباؤ، نامکمل معلومات، اور نفسیاتی چالیں — جو سادہ خریداری کو تھکا دینے والے مقابلے میں بدل دیتی ہیں۔

پاکستان جیسے ملک میں، جہاں مہنگائی نے گھریلو بجٹ کو کسا ہوا ہے اور ڈیجیٹل صارف تحفظ ابھی ترقی کے مراحل میں ہے، اس قسم کی چالاکی زیادہ گہرا زخم چھوڑ سکتی ہے۔ پاکستانی صارفین ابھی آن لائن خریداری کو قبول کرنا سیکھ رہے ہیں۔ اس طرح کے دھوکے ان کی نازک اعتماد کو ٹھیس پہنچا سکتے ہیں — اور یہ اعتماد ہی وہ چیز ہے جس پر نئے آن لائن کاروبار اپنا مستقبل تعمیر کر رہے ہیں یعنی کہ وہ چھوٹے برانڈز جو کم سرمایہ کے ساتھ کاروبار شروع کرتے ہیں اور سوشل میڈیا کے ذریعے وسیع پیمانے پر صارفین تک پہنچنے کی امید رکھتے ہیں۔