ارباب غلام رحیم نے سندھ میں پیپلز پارٹی کے لئے خطرے کی گھنٹی بجا دی
کراچی(ڈیلی پاکستان آن لائن)وزیراعظم کے معاون خصوصی برائے سیاسی امور اور سابق وزیراعلیٰ ڈاکٹر ارباب غلام رحیم نے سندھ میں تحریک انصاف کومتحرک کرنے کے لیے سیاسی رابطے شروع کردیے ہیں ، سندھ ایکشن کمیٹی کے کنونیئراورسندھ یونائیٹڈ پارٹی کے سربراہ جلال محمود شاہ سے سندھ میں تبدیلی کے لیے اہم ملاقات کی ہے،ارباب غلام رحیم کا کہنا ہے کہ وزیر اعظم جب چاہیں سندھ آئیں گے،سندھ میں تبدیلی کے لئے ہم خیال جماعتوں سے رابطہ کروں گا،تحریک انصاف کوسندھ میں آرگنائز کرنے کا ٹاسک دیا گیا ہے اور سندھ میں جو وفاقی ادارے بات نہیں سنتے ان کو بھی ٹھیک کرنے کا ٹاسک دیا گیا ہے،حلیم عادل شیخ سے میری صلح ہوچکی ہے،مجھے گرینڈ ڈیمو کریٹک موومنٹ( جی ڈی اے) سے بھی کوئی شکایت نہیں،جلدہی پیرصاحب پگارا سے ملاقات کروں گا۔
سید جلال محمود شاہ کی رہائشگاہ پران سے ملاقات کے بعد میڈیا سے گفتگو کرتے ہوئے سے گفتگو کرتے ہوئے وزیراعظم کے معاون خصوصی ارباب غلام رحیم نے کہاکہ سید جلال محمود شاہ سے دیرینہ تعلقات ہیں،ہم سندھ کی قوم پرست جماعتوں کو ساتھ لیکر چلیں گے،جلال محمود شاہ کی طبعیت خراب ہے،ان سےملنے آیا ہوں، کراچی میں نجی ہاؤسنگ سوسائٹی ایک مافیابن گئی ہے،اس کے معاملے پر کمیشن قائم کرنے پر بات ہوئی ہے،اٹھارویں ترمیم کا یہ مطلب نہیں کہ صوبے مادر پدر آزاد ہوں،نجی ہاؤسنگ سوسائٹی کے معاملے پر وزیر اعظم سے بات کروں گا،زمینوں کی بندر بانٹ کے حوالے سے صرف ایک پراپرٹی ٹائیکون نہیں سندھ حکومت ملوث ہے،نجی ہاؤسنگ سوسائٹی کے معاملے پرسندھ میں زبان کی بنیاد پر فساد پھیلانے کی کوشش کی گئی ،جلاؤ گھیراؤمیں یہ لوگ ملوث نہیں ہیں ،محب وطن قوم پرست جماعتوں کے مسائل کا وزیر اعظم سے ذکر کروں گا،تحریک انصاف اس معاملے پر لیڈنگ رول ادا کرے گی۔
انہوں نے کہاکہ سندھ حکومت جب چاہے لاک ڈاؤن لگا دیتی ہے ،انہوں نے پچھلے دور میں ایک صابن بھی بغیر تصویر کے نہیں دیاہے۔ انہوں نے کہاکہ حلیم عادل شیخ سے میری صلح ہوچکی ہے ،مجھے وزیر اعظم کا معاون خصوصی انہیں کی ایڈوائز پر بنایا گیاہے،جنرل الیکشن میں دو سال ہیں ،بلاول کو شاید لگ رہا ہوگا کہ جلد انتخابات ہونگے ،ہوسکتا ہے کہ سندھ میں انتخابات کرادیں، میں قسم کھا کر کھتا ہوں میں تحریک انصاف والینٹری طور پر جوائن کیا ہے۔
اس موقع پرصحافیوں سے گفتگو کرتے ہوئے سید جلال محمود شاہ کا کہنا تھا کہ سپریم کورٹ کے فیصلے پر سندھ حکومت عمل درآمد نہیں کررہی ،ارباب غلام رحیم کووزیراعظم کا معاون خصوصی بننے پر مبارک باد دیتا ہوں ، مجھے امید ہے اربابِ غلام رحیم صرف باتیں نہیں کام کریں گے،سندھ کے مسائل کے حل کے سنجیدگی کا مظاہرہ کریں گے۔ انہوں نے کہاکہ نجی ہاؤسنگ سوسائٹی کے معاملے پر ہمارے اوپر غلط کیس بنایا گیا ،سندھ حکومت صرف باتیں کرتی ہے عمل نہیں کرتی ،سندھ حکومت جو کرپشن کرتی ہے اس کی نشاندھی کریں گے وفاقی حکومت اس معاملے کو دیکھے کہ سندھ حکومت نے زمینوں کی بندر بانٹ کیسے کی ہے،سندھ میں زمینوں کی بندر بانٹ کی نیب سے تحقیقات کرائی جائے۔
