چیمپئنز ٹرافی کیلئے پاکستان کرکٹ ٹیم کا اعلان کردیا گیا
لاہور (جازب صدیقی) پاکستان کرکٹ بورڈ (پی سی بی) نے آئی سی سی چیمپئنز ٹرافی 2025 کے لیے 15 رکنی اسکواڈ کا اعلان کر دیا ہے۔ چیمپئنز ٹرافی پاکستان میں 19 فروری سے 9 مارچ تک منعقد ہوگی۔ پی سی بی کے پاس سکواڈ میں تبدیلی کے لیے 11 فروری تک کا وقت ہے اس کے بعد تبدیلی کی اجازت صرف طبی بنیادوں پر آئی سی سی ایونٹ ٹیکنیکل کمیٹی کی منظوری سے ہوگی۔ یہی ٹیم چیمپئنز ٹرافی سے قبل کراچی اور لاہور میں ہونے والی سہ فریقی ون ڈے سیریز میں بھی حصہ لے گی جس میں نیوزی لینڈ اور جنوبی افریقہ شامل ہیں۔
پی سی بی کے مطابق پندرہ کھلاڑیوں پر مشتمل سکواڈ میں چار تبدیلیاں کی گئی ہیں ۔عبداللہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخرزمان ، خوشدل شاہ اور سعود شکیل کو ٹیم میں شامل کیا گیا ہے۔
بیٹرز کیلئے بابر اعظم، فخر زمان، کامران غلام، سعود شکیل اور طیب طاہر کو منتخب کیا گیا ہے۔
آل راؤنڈرز میں فہیم اشرف ، خوشدل شاہ اور سلمان علی آغا (نائب کپتان ) کو شامل کیا گیا ہے۔
وکٹ کیپر بیٹرز : محمد رضوان کپتان ہوں گے جب کہ عثمان خان بھی ٹیم کا حصہ ہوں گے۔
سپیشلسٹ سپنر کے طور پر ابرار احمد جب کہ فاسٹ بولرز کے طور پر حارث رؤف، محمد حسنین، نسیم شاہ اور شاہین شاہ آفریدی کو ٹیم میں جگہ ملی ہے۔
فخر زمان جنہوں نے 2017 کی آئی سی سی چیمپئنز ٹرافی کے فائنل میں انڈیا کے خلاف سنچری سکور کی تھی کم بیک کیا ہے وہ جون 2024سے بیماری اور انجری کی وجہ سے انٹرنیشنل کرکٹ سے دور تھے۔ انہوں نے دسمبر میں چیمپئنز ٹی ٹوئنٹی کپ 2024 کے دوران عمدہ پرفارمنس دی اور 132 سے زیادہ کے متاثر کن سٹرائیک ریٹ کے ساتھ 303 رنز کے ساتھ تیسرے سب سے زیادہ رنز بنانے والے کھلاڑی تھے۔ فخر 82 ون ڈے میچوں میں46.50 کی اوسط اور 93.40 کے سٹرائیک ریٹ سے 11 سنچریوں اور 16 نصف سنچریوں کی مدد سے 3492 رنز بناچکے ہیں۔
پاکستان کے ٹیسٹ نائب کپتان سعود شکیل کو ہوم ٹیسٹ میچوں میں مسلسل اور شاندار پرفارمنس کا صلہ ٹیم میں شمولیت کی صورت میں ملا ہے۔ بائیں ہاتھ کے بیٹر نے آئی سی سی ورلڈ کپ 2023 میں کولکتہ میں انگلینڈ کے خلاف اپنا 15 واں اور آخری ون ڈے کھیلا تھا۔ اس سیزن میں بنگلہ دیش ، انگلینڈ اور ویسٹ انڈیز کے خلاف ہوم ٹیسٹ میچوں کی13 اننگز میں سعود شکیل نے 577 رنز بنائے ہیں ۔
آل راؤنڈر فہیم اشرف اور خوشدل شاہ کی 50 اوورز کے سکواڈ میں واپسی سے کپتان محمد رضوان کو اضافی آپشنز فراہم کیے گئے ہیں ۔ فہیم اشرف نے اپنا 34 واں اورآخری ون ڈے انٹرنیشنل ستمبر2023 میں کھیلا تھا اس کے بعد سے وہ ڈومیسٹک کرکٹ کے تینوں فارمیٹس میں چند مستقل مزاج پرفارمرز میں ایک رہے ہیں جبکہ خوشدل نے آخری بار اگست 2022 میں ون ڈے میں پاکستان کی نمائندگی کی تھی اور چیمپئنز ون ڈے کپ میں 176 رنز بنانے کے ساتھ ساتھ چیمپئنز ٹی ٹوئنٹی کپ میں 132 رنز بنانے کے علاوہ 9 وکٹیں حاصل کی تھیں۔
پاکستان سکواڈ میں 2017 چیمپئنز ٹرافی کا ٹائٹل جیتنے والی ٹیم کے تین کھلاڑی بابر اعظم، فہیم اشرف اور فخر زمان شامل ہیں۔ بابر اور فخر کے علاوہ حارث رؤف، شاہین شاہ آفریدی اور سعود شکیل نے آئی سی سی مینز 50 اوورز ورلڈ کپ 2023 میں بھی حصہ لیا تھا ۔ آئی سی سی مینز کرکٹ ورلڈ کپ 2023 کے بعد پاکستان نے تین ون ڈے سیریزکھیلی ہیں جن میں 50 اوورز کی عالمی چیمپئن آسٹریلیا کو 2-1، زمبابوے کو 2-1 اور جنوبی افریقہ کو 3-0 سے شکست دی ہے۔
خیال رہے کہ پاکستان چیمپئنز ٹرافی میں اپنا پہلا میچ19 فروری کو نیوزی لینڈ کے خلاف کراچی میں کھیلے گا۔
