پنجاب کے سکولز میں خواتین اساتذہ کیلئے شلوار قمیض اور دوپٹہ لازم قرار

لاہور(ڈیلی پاکستان آن لائن) پنجاب کے سکولز میں خواتین اساتذہ کیلئے شلوارقمیض اور دوپٹہ لازم قرار دے دیا گیا جبکہ مرد اساتذہ کے جینز اور ٹی شرٹ پہننے اور طالبات کے میک اپ لگانے پر پابندی عائد کر دی گئی۔

 محکمہ سکولز ایجوکیشن نے ٹیچرز کیلئے بھی ڈریس کوڈ کے متعلق ہدایات جاری کردیں۔

محکمہ سکولز ایجوکیشن نے مرد اساتذہ کیلئے جینزاور ٹی شرٹ پہننے پر پابندی عائد کردی،اسی طرح پنجاب کے تمام سرکاری اور پرائیویٹ سکولز میں سکول دورانیے میں نماز ظہر کے انتظامات کرنے کی ہدایت کر دی۔

واضح رہے کہ 26 مارچ کو محکمہ تعلیم سندھ نے سکولوں کے اساتذہ کیلئے کوڈ آف کنڈکٹ جاری کرتے ہوئے خواتین اساتذہ کیلئے زیادہ میک اپ، زیادہ زیورات اور اونچی ہیلز پہننا ممنوع قرار دے دیا تھا جبکہ مرد اساتذہ کو بھی جینز، ٹی شرٹ پہننے سے روک دیا تھا۔

محکمہ تعلیم سندھ نے سکولوں کے اساتذہ کیلئے کوڈ آف کنڈکٹ جاری کردیا تھا۔

بعد ازاں محکمہ تعلیم سندھ نے ڈریس کوڈ کے حوالے سے میڈیا پر چلنے والی خبروں کی وضاحت کرتے ہوئے کہا تھا کہ سکولوں میں کسی بھی ڈریس پر پابندی عائد نہیں کی گئی۔

محکمہ تعلیم نے وضاحت جاری کرتے ہوئے کہا تھا کہ سکولوں میں کسی بھی ڈریس پر پابندی عائد نہیں کی گئی، اساتذہ کے لیے جاری کوڈ آف کنڈکٹ کو حکم نامہ سمجھنے کے بجائے رہنما اصول سمجھا جائے۔