پائی نیٹ ورک کی منتقلی کی ڈیڈ لائن، کوائن کی قیمت میں مزید کمی
واشنگٹن (ڈیلی پاکستان آن لائن) پائی نیٹ ورک نے صارفین کو ہدایت دی ہے کہ وہ اپنی کے وائی سی (Know Your Customer) تصدیق مکمل کر کے 14 مارچ 2025 تک مین نیٹ میں منتقلی مکمل کر لیں۔ اس اعلان کے بعد پائی کرنسی کی قیمت میں شدید گراوٹ دیکھنے میں آئی ہے، جس نے سرمایہ کاروں میں بے چینی پیدا کر دی ہے۔
رپورٹ کے مطابق پائی نیٹ ورک کی قیمت 2.34 فیصد کمی کے ساتھ 1.38 ڈالر فی ٹوکن پر آ گئی ہے، جبکہ پچھلے 24 گھنٹوں کے دوران اس کے تجارتی حجم میں 24.08 فیصد کمی ریکارڈ کی گئی۔ پچھلے سات دنوں میں پائی کرپٹو کرنسی 20.43 فیصد تک نیچے جا چکی ہے، جس سے مارکیٹ میں کمزوری کا رجحان واضح ہو رہا ہے۔
پائی نیٹ ورک کی منتقلی کی ڈیڈ لائن اس کے چھٹے یوم تاسیس کے موقع پر رکھی گئی ہے، جو نیٹ ورک کے لیے ایک اہم سنگ میل ہے۔ صارفین کو ہدایت دی گئی ہے کہ وہ 14 مارچ 2025 کو پاکستانی وقت کے مطابق صبح تین بجے تک اپنی کے وائی سی اور مین نیٹ منتقلی مکمل کر لیں، ورنہ ان کے زیادہ تر پائی ٹوکن ضائع ہو سکتے ہیں۔ صرف وہی ٹوکن محفوظ رہیں گے جو منتقلی سے چھ ماہ قبل تک مائن کیے گئے ہوں گے۔
پائی نیٹ ورک کی منتقلی کا مطلب صارفین کے پائی کرپٹو کرنسی کو ٹیسٹ نیٹ سے آفیشل بلاک چین (مین نیٹ) پر منتقل کرنا ہے، تاکہ صارفین اپنی کرنسی کو پائی ایپ سے باہر مختلف پلیٹ فارمز پر بھی استعمال کر سکیں۔ کوائن پارک کے سی ای او تھنگاپانڈی دورائی کے مطابق اس منتقلی کے بعد پائی ٹوکنز کو زیادہ وسیع مالیاتی نظام میں شامل کرنے کے مواقع بڑھ جائیں گے۔
نیوز 18 کے مطابق پائی نیٹ ورک نے اپنے صارفین کو کے وائی سی مکمل کرنے کی سختی سے تاکید کی ہے، کیونکہ یہ تصدیق یقینی بناتی ہے کہ صارفین حقیقی افراد ہیں۔ اگر صارفین مقررہ مدت میں کے وائی سی مکمل نہیں کرتے تو ان کے غیر تصدیق شدہ ٹوکن ضائع ہو سکتے ہیں۔ منتقلی مکمل ہونے کے بعد پائی ہولڈرز اپنے ٹوکنز کو مین نیٹ میں لین دین کے لیے استعمال کر سکیں گے، جس سے انہیں بیرونی بلاک چینز اور ممکنہ طور پر کرپٹو ایکسچینجز کے ساتھ انضمام کا موقع ملے گا۔
اس دوران بائنانس کے نئے ٹوکن لسٹنگ ماڈل نے یہ قیاس آرائیاں تیز کر دی ہیں کہ پائی نیٹ ورک جلد ہی بائنانس پر رجسٹر ہو سکتا ہے۔ تاہم، بائنانس نے تاحال اس کی تصدیق نہیں کی ہے اور واضح کیا ہے کہ پائی نیٹ ورک کو سیکیورٹی، ریگولیٹری تعمیل، اور مسلسل صارفین کی شمولیت کے سخت معیارات پر پورا اترنا ہوگا۔
امریکہ میں کرپٹو کرنسی کے حوالے سے غیر واضح ریگولیٹری صورتحال بھی پائی نیٹ ورک کے لیے چیلنج بن سکتی ہے، خاص طور پر صدر ڈونلڈ ٹرمپ کی کرپٹو سمٹ کے بعد سخت قوانین کا امکان ظاہر کیا جا رہا ہے۔ اگر ضوابط مزید سخت ہوئے تو پائی نیٹ ورک کی مقبولیت اور قبولیت پر منفی اثر پڑ سکتا ہے۔
پائی نیٹ ورک کی کے وائی سی تعمیل اور بتدریج مین نیٹ منتقلی اسے ریگولیٹری تقاضوں سے ہم آہنگ کر سکتی ہے، مگر ابہام کی وجہ سے ادارہ جاتی اعتماد اور ایکسچینج لسٹنگ میں تاخیر ہو سکتی ہے۔ پائی نیٹ ورک جیسے چھوٹے پراجیکٹس کو قانونی پیچیدگیوں سے بچنے کے لیے مسلسل بدلتے ہوئے ضوابط پر عمل کرنا ضروری ہوگا تاکہ یہ کرپٹو مارکیٹ میں اپنی جگہ مستحکم کر سکے۔
نوٹ: یہ مارکیٹ کی صورت حال کے بارے میں تفصیلات فراہم کرنے والی محض ایک خبر ہے ، اس کو فنانشل ایڈوائس نہ سمجھا جائے۔
