سپریم کورٹ میں 9 مئی کے اہم مقدمات سماعت کیلئے مقرر

اسلام آباد (ڈیلی پاکستان آن لائن )سپریم کورٹ نے 9 مئی کے مزید اہم مقدمات سماعت کے لئے مقرر کر دیئے۔
ڈان نیوز کے مطابق بانی پاکستان تحریک انصاف (پی ٹی آئی) و سابق وزیراعظم عمران خان کا جسمانی ریمانڈ نہ دینے کے خلاف پنجاب حکومت کی اپیلیں بھی سماعت کےلئے مقرر کی گئی ہیں۔چیف جسٹس یحییٰ آفریدی کی سربراہی میں تین رکنی بینچ کل سماعت کرے گا۔اسی طرح عمران خان کی ضمانت قبل از گرفتاری بحال کرنے کے خلاف اپیلیں بھی سماعت کے لئے مقرر کی گئی ہیں۔
سپریم کورٹ نے 9 مئی کو جی ایچ کیو حملہ کیس میں شیخ رشید کی بریت کی درخواست بھی سماعت کے لئے مقرر کر لیں۔
عدالت نے رہنما پی ٹی آئی صنم جاوید کی ضمانت منسوخی کی اپیل بھی مقرر کر دی، اسی طرح سابق وفاقی وزیر فواد چودھری کی انسداد دہشت گردی عدالتوں سے متعلقہ دستاویزات نہ ملنے کی درخواست بھی مقرر کی گئی ہیں۔
یاد رہے کہ گزشتہ برس 9 مئی کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران لاہور کے علاقے ماڈل ٹاو¿ن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاو¿س بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاو¿ گھیراو¿ میں ملوث 1900 افراد کو گرفتار کر لیا گیا تھا جبکہ عمران خان اور ان کی پارٹی رہنماﺅں اور کارکنان کے خلاف مقدمات بھی درج کئے گئے تھے۔