سکول میل پروگرام کا آغاز آئندہ ماہ متوقع ،پہلے مرحلے میں  کتنے اضلاع میں شروع ہوگا۔۔؟ جانیے

لاہور ( ڈیلی پاکستان آن لائن )سکول میل پروگرام کا آغاز آئندہ ماہ متوقع ،پہلے مرحلے میں  کتنے اضلاع میں شروع ہوگا۔۔؟  اس حوالے سے وزیر تعلیم رانا سکندر حیات نے کہا ہے کہ پنجاب کے سرکاری سکولوں میں میل پروگرام کا آغاز آئندہ ماہ سے ہوگا۔ ابتدائی طور پر جنوبی پنجاب کے 3 اضلاع سے میل پروگرام کا آغاز کیا جا رہا ہے۔ پہلے مرحلے میں ڈی جی خان، مظفر گڑھ اور راجن پور کے سرکاری سکولوں میں بچوں کو دودھ اور کھانا فراہم کیا جائے گا جس کے بعد اسے مرحلہ وار دیگر اضلاع تک پھیلایا جائے گا۔ انہوں نے کہا کہ ہمارے کروائے گئے ایک سروے کے دوران مذکورہ تینوں اضلاع میں بچے ذہنی اور جسمانی لحاظ سے کمزور پائے گئے۔ وزیر اعلیٰ پنجاب کی ہداہت پر ان اضلاع کے طلبہ کی غذائی ضروریات کو پورا کرنے کیلئے انہیں دودھ اور کھانا فراہم کیا جائے گا۔

 رانا سکندر حیات نے کہا کہ سکول میل پروگرام سے تمام پبلک سکولوں کے طلبہ مستفید ہوں گے۔ میل پروگرام میں معیار پر کسی قسم کا سمجھوتہ نہیں کیا جائے گا۔ اس ضمن میں مختلف افراد اور کمپنیوں سے مشاورت جاری ہے۔ جلد اس پر حتمی فیصلہ کرتے ہوئے مستند کمپنی کے انتخاب اور اشتراک سے سکول میل پروگرام کو حتمی شکل دے دی جائے گی۔