دنیا کا سب سے بڑا پٹرول پمپ، ایک وقت میں 120 گاڑیاں فیول بھرواسکتی ہیں

واشنگٹن  (ڈیلی پاکستان آن لائن) امریکہ کی ریاست ٹیکساس میں واقع "بکیز" (Buc-ee’s) دنیا کا سب سے بڑا پیٹرول پمپ بن چکا ہے، جو نہ صرف اپنی وسعت بلکہ منفرد سہولیات کے باعث لوگوں کو حیران کر رہا ہے۔ نیوز 18 کے مطابق یہ پمپ ٹیکساس کے شہر لولنگ (Luling) میں واقع ہے، جو آسٹن شہر سے تقریباً 47 میل کے فاصلے پر ہے۔ یہاں بیک وقت 120 گاڑیوں کیلئے  ایندھن بھرنے کی سہولت دستیاب ہے، اور اس کا رقبہ  75 ہزار مربع فٹ پر پھیلا ہوا ہے۔
حال ہی میں ایک سوشل میڈیا انفلوئنسر ٹوڈ نے اس پیٹرول پمپ کا دورہ کیا اور اپنی ویڈیو میں اپنے  تجربات شیئر کیے، جو دیکھتے ہی دیکھتے وائرل ہو گئی۔ ٹوڈ نے نہ صرف اس کے بے مثال سائز کی تعریف کی بلکہ اس کے کھانے، صفائی اور دیگر سہولیات کو بھی سراہا۔ انہوں نے بتایا کہ اندر ایک بہت بڑی دکان ہے جہاں مٹھائیاں، بیکری اشیاء، ملبوسات اور صاف ستھرے ٹوائلٹس دستیاب ہیں۔ اس کے علاوہ ایک علیحدہ حصہ تازہ تیار کردہ باربی کیو اور "بریسکٹ" کے لیے مخصوص ہے۔
ٹوڈ نے خاص طور پر "تھری میٹ بن" کی تعریف کی، جو دکھنے میں عام سا تھا مگر ذائقے میں لاجواب نکلا۔ اس میں موجود مٹھاس، باربی کیو سوس اور نرم روٹی نے اسے دوبارہ کھانے کے قابل بنا دیا۔ انہوں نے ایک ٹورٹیلا میں لپٹا ہوا ساسیج بھی آزمایا جس کی قیمت 4.99 ڈالر تھی، اور اسے شہد سے بنی مسٹرد چٹنی کے ساتھ پیش کیا گیا۔ ٹوڈ کے مطابق یہ چیز بھی بہت معیاری اور خوش ذائقہ تھی۔
"بکیز" صرف ایک پیٹرول پمپ نہیں بلکہ ایک مکمل تجربہ ہے، جہاں ٹیکساس باربی کیو، گھر کی بنی فَج، مشہور بیور نگٹس، جرکی، اور تازہ بیکڈ اشیاء دستیاب ہیں۔ امریکہ بھر میں اس کمپنی کے 50 سٹورز ہیں جن میں سے 35 صرف ٹیکساس میں واقع ہیں۔ یہ سٹورز خاص طور پر اپنے کھلے، صاف اور آرام دہ واش رومز کے لیے جانے جاتے ہیں۔
اس سے قبل سیویئر وِل ٹینیسی میں واقع بکیز دنیا کا سب سے بڑا پیٹرول پمپ سمجھا جاتا تھا، جس کا رقبہ 74 ہزار 707  مربع فٹ تھا اور وہاں دنیا کا سب سے طویل کار واش بھی موجود ہے۔ تاہم اب یہ اعزاز لولنگ، ٹیکساس کے بکیز کو حاصل ہو گیا ہے۔